लोकशाही न्यूज नेटवर्क
जेवणासाठी गेलेल्या एका पोलीस हवालदाराशी एकाला तीन जणांनी क्षुल्लक कारणांनी मारहाण केल्याची घटना कुसुंबा येथे एका हॉटेलमधे घडली असून सीसीटीव्ही फुटेजच्या आधारे यातील एकाला एमआयडीसी पोलिसांनी आज सकाळी ताब्यात घेतले असून इतर दोघांचा पोलीस शोध घेत आहे.
सूत्रांची दिलेली माहिती अशी कि, मिर्झा मोहम्मद इसराल हिमायू बेग (वय-३८) रा. जामनेर, जि.जळगाव हे सोयगाव पोलीस ठाण्यात पोलीस हवलदार म्हणून नोकरीवर आहेत. सोमवारी ९ जानेवारी रोजी मिर्झा बेग हे त्यांचे मित्र सलीम शेख रा. जामनेर यांच्यासोबत दुचाकीने जळगावला खासगी कामासाठी आलेअसता काम आटोपून पुन्हा दुचाकीने मित्रासोबत जामनेला जाण्यासाठी निघाले. जळगाव तालुक्यातील कुसुंबा गावातील रॉकेश हॉटेल येथे सायंकाळी ५.३० वाजता जेवण करण्यासाठी थांबले. त्यावेळी हॉटेलात तीन जणांनी त्यांचा मित्र सलीम शेख याला काहीही कारण नसतांना मारहाण केली. भांडण सोडविण्यासाठी मिर्झा बेग हे गेले असता त्यांना देखील तिघांनी मारहाण केली. पोलीसांना मिळालेल्या सीसीटीव्ही कॅमेऱ्याच्या आधारे तिघांची नावे निष्पन्न झाली.
यात संशयित आरोपी आकाश विश्वे रा. सुप्रिम कॉलनी, सुनिल सुभाष साळवे रा. पाळासखेडा ता. सोयगाव जि.औरंगाबाद आणि सुनिल सोनार (पुर्ण नाव माहिती नाही) या तिघांविरोधात सोमवारी उशिरा एमआयडीसी पोलीस स्टेशनला गुन्हा दाखल करण्यात आला. यातील संशयित आरोपी सुनिल सुभाष साळवे याला मंगळवारी १० जानेवारी रोजी सकाळी ८ वाजता अटक करण्यात आली .
