गांधीनगर : गुजरातचे माजी मुख्यमंत्री आणि माजी केंद्रीय मंत्री शंकरसिंह वाघेला यांनी राष्ट्रवादीला सोडचिठ्ठी दिली आहे. पक्षाध्यक्ष शरद पवार यांना पत्र लिहित राष्ट्रवादीचे राष्ट्रीय महासचिव शंकरसिंह वाघेला यांनी प्राथमिक सदस्यत्वाचा राजीनामा दिला.
शंकरसिंह वाघेला यांनी 2019 च्या निवडणुकांवेळी राष्ट्रवादीत प्रवेश केला होता. त्यावेळी माजी केंद्रीय मंत्री प्रफुल पटेल यांच्यासह अहमदाबादहून मुंबईत येत वाघेला यांनी हाती ‘घड्याळ’ बांधलं होतं. परंतु राष्ट्रवादीच्या गुजरात प्रदेशाध्यक्षपदावरुन उचलबांगडी केल्याने शंकरसिंह वाघेला नाराज होते. अखेर शरद पवारांना पत्र लिहित वाघेलांनी राजीनामा दिला.
शंकरसिंह वाघेला यांनी जनसंघाच्या माध्यमातून राजकीय कारकिर्दीला सुरूवात केली होती. नंतरच्या भारतीय जनता पार्टीमध्ये ज्येष्ठ नेते असलेल्या वाघेलांनी पक्षाला सोडचिठ्ठी देत १९९६ साली स्वत:चा राष्ट्रीय जनता पार्टी हा पक्ष स्थापन केला. १९९६ ते १९९७ गुजरातचे मुख्यमंत्री असलेल्या वाघेलांनी गेल्या वर्षी राष्ट्रवादीमध्ये प्रवेश केला होता.