चोपडा, लोकशाही न्यूज नेटवर्क
रात्री बेकायदेशीररीत्या सुगंधित पानमसाला व गुटख्याची वाहतूक करणारे वाहन चोपडा तालुक्यातील नागलवाडी रोडवर पकडले असून सुमारे २५ लाख ५० हजार रुपये किमतीचा मुद्देमाल जप्त करण्यात आला आहे.
चोपडा ते नागलवाडी रोडवर असलेल्या शिवमंदिरात जवळून एक पिकअप व्हॅनमध्ये बेकायदेशीररित्या सुगंधित पानमसाला व गुटखाची वाहतूक होत असल्याची गोपनीय माहिती चोपडा शहर पोलीस ठाण्याचे पोलीस निरीक्षक यांनी मिळाली. या गुप्त माहितीनुसार पोलिसांनी नागलवाडीरोडवर सायंकाळी ८ वाजता कारवाई करत वाहन क्रमांक (एमएच २० सिटी ६९६४) या वाहनांची तपासणी केली असता व्हॅनमध्ये २० लाख ४० हजार ४०० रुपये किमतीचा सुगंधित पानमसाला तंबाखू आणि गुटखा असा मुद्देमाल आढळून आला.
याप्रकरणी संशयित आरोपी चंद्रकांत लक्ष्मण हटकर (वय ३५, रा. तांबापुरा) आणि अजय अरुण पाटील (रा. चोपडा) असे नावे समोर आले आहे. याबाबत पोलीस नाईक हेमंत कोळी यांनी दिलेल्या फिर्यादीवरून संशयित आरोपी चंद्रकांत लक्ष्मण हटकर आणि अजय अरुण पाटील यांच्या विरोधात चोपडा शहर पोलीस ठाण्यात गुन्हा दाखल करण्यात आला असून पुढील तपास सहाय्यक पोलीस निरीक्षक संतोष चव्हाण करीत आहे.
