जळगाव, लोकशाही न्यूज नेटवर्क
दिवसेंदिवस ऑनलाईन फसवणुकीचे प्रकार उघडकीस येत आहेत. जळगाव शहरातील एका डॉक्टराला बँकतून बोलत असल्याचे सांगून ४९ हजाराची ऑनलाइन फसवणूक केल्याची घटना उघडकीस आली आहे. याप्रकरणी शनीपेठ पोलीस ठाण्यात अज्ञात महिलेवर गुन्हा दाखल करण्यात आला आहे.
सदर डॉक्टर हे जळगाव शहरातील जोशी पेठ येथे आपल्या कुटुंबियांसह राहतात. १५ मार्च रोजी सकाळी ११ वाजता त्यांना ८११४१७५१७३ क्रमांकावरून अनोळखी महिलेचा फोन आला. आपण आयसीआयसीआय बँकेतून बोलत असल्याची बतावणी करून आपल्या बँक खात्यातून ट्रॅन्झॅक्शन होत आहे. ते बंद करावे लागेल. तुम्ही बंद करणार नाही तर दर महिन्याला तुमच्या खात्यातून ४९३१२ रूपये भरावे लागतील असे सांगून डॉक्टरला ओटीपी नंबर बोलण्यात फसवणूक करून विचारून घेतला.
दरम्यान लागलीच डॉक्टरच्या खात्यातून ४९ हजार ६१२ रूपये कमी झाल्याचा मॅसेज आला. आपली फसवणूक झाल्याचे लक्षात आल्यानंतर डॉक्टरांनी शनीपेठ पोलीस ठाण्यात धाव घेवून तक्रार दिली आहे. त्यांच्या तक्रारीवरून रविवारी ८ मे रोजी शनीपेठ पोलीसात गुन्हा दाखल करण्यात आला आहे. याप्रकरणी पुढील तपास पोलीस उपनिरीक्षक प्रदीप बोरूडे करीत आहे.
