निवडणूक ड्युटीदरम्यान सुरक्षा कर्मचाऱ्याचा हृदयविकाराच्या झटक्याने मृत्यू…

 

मिझोराम, लोकशाही न्यूज नेटवर्क;

 

देशातील २१ राज्ये आणि केंद्रशासित प्रदेशांमध्ये शुक्रवारी पहिल्या टप्प्यात मतदान झाले. त्याच अनुषंगाने शुक्रवारी उत्तर-पूर्व राज्य मिझोराममध्येही मतदान झाले. मिझोरममध्ये लोकसभा निवडणुकीच्या कर्तव्यावर तैनात असलेल्या 28 वर्षीय सुरक्षा कर्मचाऱ्याचा शुक्रवारी हृदयविकाराच्या झटक्याने मृत्यू झाला. याबाबत अधिकाऱ्यांनी माहिती दिली कि, द्वितीय भारतीय राखीव बटालियन (IRB) मध्ये तैनात लालरिपुईया शुक्रवारी सकाळी चंफई जिल्ह्यातील वांगछिया मतदान केंद्रावर मृतावस्थेत आढळून आले, जेव्हा त्यांच्या सहकाऱ्यांनी त्यांना उठवण्याचा प्रयत्न केला.

मृतदेह मूळ गावी पाठवला

पहाटे ४.४५ च्या सुमारास त्यांचा मृत्यू झाल्याचे अधिकाऱ्यांनी सांगितले. ते म्हणाले की, चंफई जिल्ह्यात शवविच्छेदन केल्यानंतर, मृतदेह खवजवाल जिल्ह्यातील कवलखुल्ह या मूळ गावी पाठवण्यात आला. यावेळी चंफई जिल्ह्याचे उपायुक्त आणि जिल्हा निवडणूक अधिकारी जेम्स लालरिन्चन्ना आणि चंफईचे पोलिस अधीक्षक विनीत कुमार उपस्थित होते. जेम्स यांनी मृत सुरक्षा कर्मचाऱ्यांच्या कुटुंबाप्रती शोक व्यक्त केला आणि सांगितले की ही माहिती राज्याचे मुख्य निवडणूक अधिकारी (सीईओ) मधुप व्यास यांना देण्यात आली आहे.

कुटुंबाला नुकसानभरपाईची रक्कम दिली जाईल

जेम्स म्हणाले की, निवडणूक ड्युटी दरम्यान मृत्यू झाल्यास देण्यात येणारी सानुग्रह रक्कम त्यांच्या कुटुंबियांना लवकरात लवकर दिली जाईल. लालरिपुईया यांचा जन्म एप्रिल 1996 मध्ये झाला होता आणि ते जानेवारी 2018 मध्ये दुसऱ्या भारतीय राखीव बटालियनमध्ये सामील झाले होते.