लोकशाही न्यूज नेटवर्क
अयोध्येत बाबरी पाडल्यानंतर १९९३ मध्ये देशभरात मुंबईसह ६ ठिकाणी ट्रेन्समध्ये सिरीयल बॉम्ब ब्लास्ट झाले होते. यातील एक आरोपी अब्दुल करीम टुंडा याची अजमेरच्या टाडा कोर्टाने सुटका केली आहे. तर इतर दोन आरोपी इरफा आणि हमीदुद्दीनं यांना जन्मठेपेची शिक्षा सुनावली आहे.
१९९३ मध्ये कोटा, लखनऊ, कानपूर, हैदराबाद, सूरत आणि मुंबई या शहरांमधील ट्रेन्समध्ये सिरियल बॉम्ब ब्लास्ट झाले होते. या प्रकरणावरील सुनावणीवर सरकारी वकीलांनी प्रतिक्रिया देताना सांगितलं की, टुंडा याची कुठल्या कारणांमुळं सुटका झाली, यावर निकालाचं वाचन केल्यानंतर टिप्पणी करता येईल.
२०१३ मध्ये झाली होती अटक
सीबीआयनं टुंडाला या स्फोटांचा मास्टरमाइंड ठरवलं होत. तसेच २०१३ मध्ये नेपाळच्या बॉर्डरवरून त्याला अटक झाली होती. टुंडा याच्यावर देशातील विविध ठिकाणी दहशतवादी कारवायांप्रकरणी खटले सुरु आहेत. टुंडा यानं कथितरित्या तरुणांना भारतात दहशतवादी कारवाया करण्यासाठी प्रशिक्षण दिल होत. एक पाकिस्तानी नागरिक जुनैदसोबत त्यानं १९९८ मध्ये गणेशोत्सवादरम्यान दहशतवादी हल्ला केल्याची योजना आखली होती.
कोण आहे टुंडा?
मुंबई बॉम्ब ब्लास्टमध्ये सहभागी होण्यापूर्वी टुंडानं जालीस अन्सारीसोबत मुंबईत मुस्लिम समुदायासाठी काम करण्याच्या उद्देशानं ‘तंजीम इस्लाह उल मुस्लीमीन’ नावाची संस्था स्थापना केली होती. मध्य दिल्लीच्या दारियागंजमध्ये छत्ता लाल मिया भागात एका गरीब कुटुंबात जन्मलेल्या टुंडाने आपल्या वडिलांचं गाव गाझियाबादमध्ये सुतारकाम सुरु केलं होत.
त्यानंतर त्यानं भंगार व्यवसायही केला. ८०च्या दशकात पाकिस्तानी गुप्तचर एजन्सी आयएसआयच्या एजंट्सच्या माध्यमातून तो लष्कर-ए-तोयबा या दहशतवादी संघटनेच्या संपर्कात आला. त्यानंतर तो एक कट्टरपंथी बनला.
