यवतमाळ :- हॉटेलच्या सफाई कामगाराने एका १० वर्षांच्या मुलीचा विनयभंग केल्याच्या घटनेने खळबळ उडाली आहे. या प्रकरणी अक्षय शंकर चांदेकर (वय २५) याला पोलिसांनी अटक केली आहे.
दारव्हा मार्गावर असलेल्या एका हॉटेलच्या लॉनवर बुधवारी लग्न समारंभ होता. पीडित मुलगी आपल्या आईवडिलांसह या लग्नासाठी अली होती. लग्नसमारंभाला मोठ्या प्रमाणात गर्दी झाली होती. गर्दीत ही मुलगी एकटी असल्याचे पाहून सफाई कामगार अक्षय चांदेकर याने तिला पकडून तिचा विनयभंग केला. मुलगीनं त्याच्या तावडीतून स्वत:ची सुटका करून घेऊन तिथून लगेचच पळ काढला व घडलेला प्रकार आपल्या आईवडिलांना सांगितला.
तिथं उपस्थित असलेल्या इतर पाहुणे मंडळींनाही ही गोष्ट कळली. त्यांनी लगेचच या सफाई कामगाराला ताब्यात घेतले. त्यानंतर लोहारा पोलिसांना याची माहिती देण्यात आली. घटनेची माहिती मिळताच ठाणेदार सचिन लुले हे आपल्या पथकासह तिथं पोहोचले. त्यांनी आरोपी अक्षय चांदेकरला ताब्यात घेतले. पोलिसांनी हॉटेलच्या सीसीटीव्हीचे फूटेज तपासले असता त्यात हा संपूर्ण प्रकार कैद झाल्याची माहिती मिळाली. या प्रकरणी पुढील कारवाई सुरू आहे.
