मुंबई – जीएसटी अधिकाऱ्यानं कफ परेड येथील वर्ल्ड ट्रेड सेंटर इमारतीच्या ३० व्या मजल्यावरून उडी मारून आत्महत्या केल्याची घटना दि.१३ रोजी संध्याकाळी घडली. तेथील नागरिकांनी त्यांना जवळच्या रुग्णालयात नेलं. मात्र, उपचारापूर्वीच त्यांचा मृत्यू झाला होता.
हरेंद्र कपाडिया (वय ५१) असं अधिकाऱ्याचे नाव असून आजाराला कंटाळून आत्महत्या केल्याचा प्राथमिक अंदाज आहे. ब्रेन स्ट्रोकमुळं गेल्या आठ ते दहा महिन्यांपासून ते कामावरही गेले नव्हते. त्यांच्या मेंदूवर शस्त्रक्रिया करण्यात आली होती,’ अशी माहिती पोलिसांनी दिली. आजाराला कंटाळून त्यांनी आत्महत्येसारखे टोकाचे पाऊल उचलले, अशी माहिती प्राथमिक चौकशीतून समोर आल्याचे पोलिसांनी सांगितले. या प्रकरणी अपघाती मृत्यूची नोंद करण्यात आली असून, पुढील चौकशी करण्यात येत आहे. या घटनेची माहिती कपाडिया यांच्या कुटुंबीयांना दिल्याची माहिती पोलिसांनी दिली.