चाळीसगाव : शहरात टाकळी भागातील स्वयंवर मंगल कार्यालयाच्या समोर असलेले स्टेट बँकेचे एटीएम मशीनच चोरट्यांनी पळवून नेले. मंगळवारी रात्री दीड ते दोन वाजेच्या दरम्यान ही घटना घडली. हे एटीएम भर रस्त्यावर अत्यंत वर्दळीच्या भागात आहे. चोरट्यांनी काचेचा दरवाजा फोडून मशीन लांबविले. मंगळवारी दुपारी या एटीएममध्ये १७ लाखाची रोकड भरल्याची माहिती समोर येत आहे.
रात्री गस्त घालणाऱ्या चाळीसगाव शहर पोलिसांच्या पथकाला चोरीची घटना लक्षात आली. त्यांनी गाळे मालकाला झोपेतून उठवून पोलीस निरीक्षक विजयकुमार ठाकूरवाड यांनाही ही घटना कळवली. घटनास्थळी ठाकूरवाड यांच्यासह एपीआय विशाल टकले, निसार सय्यद यांनी धाव घेत पंचनामा व तपासाची प्रकिया सुरू केली आहे. तसेच जळगाव एलसीबी व श्वान पथकही घटनास्थळाकडे रवाना झाले आहे.
भर वस्तीतील एटीम पळविल्याने शहरात खळबळ उडाली आहे. चाेरट्यांनी जवळपास १७ लाखांची रोकड व एटीम मशिन लंपास केल्याचा प्राथमिक अंदाज आहे. बँकेचे वरिष्ठ अधिकारीही घटनास्थळी पोहोचले आहेत. पोलिसांनी तपासचक्रे फिरविण्यास सुरुवात केली आहे.
