श्रीनगर: – जम्मू-काश्मीरमध्ये पाकव्याप्त काश्मीरमधून २० दहशतवाद्यांनी घुसखोरी केल्याचे वृत्त असून, सुरक्षा दलांवर मोठा हल्ला होण्याची शक्यता आहे. त्या पार्श्वभूमीवर राज्यात हायअलर्ट जारी करण्यात आला आहे. मिळालेल्या माहितीनुसार, आगामी काही दिवसांत लष्कराच्या विविध ठिकाणांवर आत्मघाती हल्ला होऊ शकतो. तसेच हा हल्ला ‘हिट अॅण्ड रन’सारखा केला जाईल, अशी शक्यता व्यक्त करण्यात आली आहे.
रमजानच्या महिन्यात दहशतवादविरोधी कारवाया थांबवण्यात येत असल्याची घोषणा सरकारनं केल्यानंतर सीमेवर दहशतवादी कारवायांमध्ये सातत्याने वाढ होत आहे. बुधवारी जवानांच्या गस्तीपथकावर हल्ला करणाऱ्या दोन दहशतवाद्यांना कंठस्नान घालण्यात सुरक्षा दलांना यश आलं होतं. दरम्यान घुसखोरी करणारे दहशतवादी हे जैश-ए-मोहम्मद या संघटनेचे असल्याचे सांगण्यात येत आहे.
जम्मू-काश्मीरमध्ये दहशतवादी घुसल्याची माहिती मिळाल्यानंतर भारतीय लष्कर सावध झाले आहे. सुंजवान आणि पठाणकोट हल्ल्यांपासून धडा घेत यावेळी कोणतीही चूक न करण्याचा निर्णय लष्करानं घेतला आहे. गस्ती पथक, चौक्यांसह लष्कराच्या महत्त्वाच्या ठिकाणांवर अलर्ट जारी करण्यात आला आहे.
