लोकशाही न्यूज़ नेटवर्क
यावल – तालुक्यातील फैजपूर जवळील मधुकर सहकारी साखर कारखान्याच्या (madhukar sahakari sakhar kharkhana ) आवारातील अनेक झाडे बेकायदेशीरपणे तोडण्यात आली. याबाबत तक्रार करूनही अजून चौकशी, कारवाई झालेली नाही. याबाबत फैजपूरच्या माजी नगराध्यक्षांसह शिवसेना, राष्ट्रवादी काँग्रेसच्या पदाधिकाऱ्यांनी मंगळवारी तहसीलदारांची भेट घेतली.
फैजपूरजवळील मधुकर सहकारी साखर कारखाना जिल्हा बँकेने (jilha bank) थकीत कर्जापोटी विक्री केला होता. या विक्रीनंतर संबंधित खरेदीदाराने कारखान्याच्या आवारातील सुमारे ४० वर्षे वाढलेली हिरवेगार झाडे तोडली. हा प्रकार कारखान्यात आंदोलन करताना शेतकरी तथा राष्ट्रवादी काँग्रेसचे जिल्हा सरचिटणीस विजय प्रेमचंद पाटील व भाजपचे युवा जिल्हा सरचिटणीस राकेश फेगडे यांच्या निदर्शनास आला. यानंतर दोन्ही पदाधिकाऱ्यांनी प्रांताधिकारी कैलास कडलग, तहसीलदार महेश पवार आणि वन विभागाचे (पूर्व) वनक्षेत्र अधिकारी विक्रम पदमोर यांच्याकडे निवेदनातून तक्रार केली. मात्र, अद्यापही या प्रकरणी कोणतीही कारवाई झालेली नाही.
त्यामुळे फैजपूरचे माजी नगराध्यक्ष नीलेश राणे, शिवसेनेचे मुन्ना पाटील व काँग्रेसचे पदाधिकारी तथा नावरे माजी सरपंच समाधान पाटील, ललित चौधरी यांनी मंगळवारी तहसीलदार महेश पवार यांची भेट घेतली. वृक्षतोडीची चौकशी व कारवाईची मागणी (karvaichi magani) केली. दरम्यान, राज्याच्या हिवाळी अधिवेशनात मसाकाच्या विक्री प्रक्रियेला राज्य सरकारने स्थगिती देण्याची घोषणा केली. यानंतर कधी साखर निर्यात कोटा, तर कधी वृक्षतोड या मुद्द्यावर मसाका चर्चेत आहे.
