मुंबई, लोकशाही न्यूज नेटवर्क
छत्रपती संभाजीनगर शहरातील किराडपुरा भागात बुधवारी मध्यरात्री दोन गटात झालेल्या वादानंतर जाळपोळ आणि दगडफेकीची घटना समोर आली आहे.
दरम्यान या प्रकरणी पोलिसांनी 400 पेक्षा अधिक हल्लेखोरांविरोधात गुन्हा दाखल केला आहे. तसेच पोलिसांकडून आता आरोपींची धरपकड देखील करण्यात येत आहे. छत्रपती संभाजीनगर शहर पोलिसांनी आत्तापर्यंत 10 लोकांना अटक केली आहे. विशेष म्हणजे यातील दोन संशयीत मुख्य आरोपी असल्याची माहिती समोर येत आहे. तर या दोघांनी पोलिसांच्या गाड्या पेटवून देत दगडफेक केली असल्याची देखील माहिती समोर येत आहे.
छत्रपती संभाजीनगर शहरात झालेल्या राड्याप्रकरणी पोलीस आयुक्त निखील गुप्ता यांनी 10 पथकाची नियुक्ती केली आहे. या सर्व पथकाकडून राडा करणाऱ्या आरोपींचा शोध घेतला जात आहे. तर किराडपुरा राडा प्रकरणी आत्तापर्यंत दहा जणांना पोलिसांकडून अटक करण्यात आली आहे. त्यातील आठ जणांना कोर्टामध्ये हजर करण्यात आले असता, 3 एप्रिलपर्यंत पोलीस कोठडी सुनावण्यात आली आहे. तर अजूनही अटक सत्र सुरू आहे. त्यासाठी पोलिसांची10 पथक तैनात करण्यात आली आहेत. सीसीटीव्ही तपासून अटकेची कारवाई करण्यात येते आहे. तर पोलिसांनी अटक केलेल्या आरोपींपैकी दोन जण मुख्य आरोपी असल्याची माहिती समोर येत आहे.
बरकत शौकत शेख (वय 23 वर्षे रा. यासीन मस्जिद जवळ, कटकट गेट, छत्रपती संभाजीनगर), शेख अतिक शेख हारूण (वय 24 वर्षे रा. अरफात मशिद जवळ, कटकटगेट, छत्रपती संभाजीनगर), सद्दामशहा बिस्मिल्ला शहा (वय 33 वर्षे रा. अरफात मशिद जवळ, कटकटगेट, किराडपुरा, छत्रपती संभाजीनगर), शेख खाजा शेख रशिद (वय 25 वर्षे रा. खासगेट, छत्रपती संभाजीनगर), शारेख खान इरफान खान (वय 23 वर्षे रा. राजाबाजार शकिल भाई यांचे घरात, छत्रपती संभाजीनगर), शेख सलीम शेख अजीज (वय 25 वर्षे रा. सेंदुरजण, सिंदखेडराजा जि. बुलढाणा), सय्यद नूर सय्यद युसूफ ( वय 30 वर्षे रा. सिकंदर हॉल जवळ, ग.नं. 6, बायजीपुरा, छत्रपती संभाजीनगर), शेख नाजीम शेख अहेमद (वय 24 वर्षे रा.तुबा मस्जिद जवळ, किराडपुरा, छत्रपती संभाजीनगर) असे आरोपींचे नावं आहेत.
छत्रपती संभाजीनगर शहरात झालेल्या राड्याप्रकरणी पोलीस आयुक्त निखिल गुप्ता यांनी ‘एसआयटी’ची स्थापना केली आहे. किराडपुरा भागात झालेल्या या राड्याची एसआयटी पथकाकडून सखोल चौकशी केली जाणार आहे. सिडको पोलीस ठाण्याचे निरीक्षक संभाजी पवार हे या पथकाचे प्रमुख असणार आहे. तसेच या पथकात जिन्सी ठाण्यातील सहायक निरीक्षक अनिल मगरे, सायबरचे उपनिरीक्षक राहुल चव्हाण, गुन्हे शाखेचे कल्याण शेळके, वेदांतनगर ठाण्याचे उत्रेश्वर मुंडे, सिटी चौक ठाण्याचे रोहित गांगुर्डे, मुकुंदवाडी ठाण्याचे बाळासाहेब आहेर या अधिकाऱ्यांसह हवालदार अरुण वाघ, संजय गावंडे, सुनील जाधव यांचा विशेष तपास पथकात समावेश आहे.
