पुणे, लोकशाही न्यूज नेटवर्क
राज्यातील सीबीएसई शाळांचा (CBSE Schools) मोठा घोटाळा (Scam) उघडकीस आला आहे. राज्यात सीबीएसई शाळांना बनावट ना हरकत प्रमाणपत्र वाटप झाले आहे. हे प्रमाणपत्र लाखोंना विकले गेल्याची देखील उघड झाले आहे. याप्रकरणी ३ शाळांवर गुन्हा दाखल करण्यात आला आहे. राज्यातील ६६६ शाळांची तपासणी सुरु करण्यात आली आहे. युडायस प्रणालीत ना हरकत प्रमाणपत्र अपलोड न करणाऱ्या शाळांना हे प्रमाणपत्र अपलोड करण्याचे आदेश शिक्षण विभागाने दिले आहेत.
या शाळांवर कारवाई
पुण्यात सीबीएसई शाळांना राज्य शासनाचे बोगस ना हरकरत प्रमाणपत्र (एनओसी) विकणारी टोळी कार्यकरत होती. या प्रकरणी जिल्हा परिषदेच्या माध्यमिक शिक्षण विभागाकडून पोलिसांकडे तक्रार दाखल केली गेली. या तक्रारीनंतर पुण्यातील एम. पी. इंटरनॅशनल स्कुल एन्ड ज्युनियर कॉलेज, शिवाजीनगर , क्रिएटिव्ह एज्युकेशन पब्लिक स्कुल एन्ड ज्युनियर कॉलेज आणि नमो आर आय एम एस इंटरनॅशनल स्कुल एन्ड ज्युनियर कॉलेज या तीन शाळांवर गुन्हा दाखल करण्यात आलाय.
कसा केला प्रकार
राज्य मंडळाव्यतीरिक्त इतर मंडळांच्या अभ्यासक्रमाशी संलग्न शाळांना ना-हरकत प्रमाणपत्र देण्याची कारवाई राज्य सरकारकडून होते. परंतु पुण्यात काही शाळा व संस्था चालकांनी बनावट एनओसी प्रमाणपत्र मिळवले. या शाळांच्या एनओसीबाबतचे कोणतेही आदेश शासनाने काढले नव्हते. या प्रकरणाचे धागेदोरे थेट मंत्रालयात असल्याचे उघड झाले आहे. मंत्रालयतील उच्चपदस्थ अधिकाऱ्यांच्या बनवाट सह्या व शिक्के वापरुन ही प्रमाणपत्र दिली गेली आहे. हा प्रकार उघड झाल्यानंतर शिक्षण विभागाने पोलिसांकडे तक्रार दाखल केली आहे. ही बनावट प्रमाणपत्र १२ लाख रुपयांना विकली गेली.
