जयपूर, लोकशाही न्यूज नेटवर्क;
राजस्थानची राजधानी जयपूरमधील एका हॉटेलमध्ये बिबट्या दिसल्याने खळबळ उडाली आहे. जयपूरमधील खासगी कॅसल कनोटा हेरिटेज हॉटेलमध्ये बिबट्या घुसल्याचे सांगण्यात येत आहे. खूप प्रयत्नानंतर त्याला तेथून बाहेर काढण्यात आले. यादरम्यान हॉटेलच्या कर्मचार्‍यांना कोणतीही इजा झाली नाही. मिळालेल्या माहितीनुसार, गुरुवारी सकाळी 9.40 वाजता एका नाट्यमय घटनेत जयपूरमधील कॅसल कनोटा हेरिटेज हॉटेलमध्ये बिबट्या घुसला. हॉटेलमध्ये उपस्थित असलेल्या पर्यटकांना तातडीने बाहेर काढण्यात आले.
हॉटेल कर्मचारी, स्थानिक अधिकारी आणि वन्यजीव बचाव पथकांनी बिबट्याला शांत करण्यासाठी दोन तासांहून अधिक काळ अथक परिश्रम घेतले. हॉटेलमधील कुत्रे अचानक भुंकायला लागल्याने हा प्रकार लक्षात आला. कर्मचाऱ्यांनी कुत्र्यांना शांत करण्याचा प्रयत्न करूनही ते भुंकत राहिले. सकाळी दहा वाजता हॉटेल मालक मानसिंग यांनी तत्काळ वनविभागाच्या पथकाला माहिती दिली.
हॉटेल रिकामे करण्यात आले
यावेळी पर्यटकांनी हॉटेल रिकामे केले आणि बिबट्या एका स्टाफ रूममध्ये घुसला. बिबट्याला पुढे जाण्यापासून रोखत लोकांनी बाहेरून दरवाजा बंद केला. बिबट्याने चपळाई दाखवून खोलीतील वस्तू विखुरल्या. वनविभागाच्या पथकाने घटनास्थळी पोहोचून बिबट्याला यशस्वीरित्या शांत केले, त्यामुळे हॉटेल कर्मचारी आणि पाहुण्यांना मोठा दिलासा मिळाला.
कोणतीही जीवितहानी झाली नाही
बस्सी रेंजर पृथ्वीराज मीना यांनी सांगितले की, सकाळी बिबट्याच्या प्रवेशाची माहिती मिळाली. त्यांची टीम आणि जयपूर प्राणीसंग्रहालयाची टीम बचावकार्यासाठी तातडीने घटनास्थळी पोहोचली. सुदैवाने संपूर्ण बचाव कार्यात कोणतीही जीवितहानी झाली नाही. बिबट्याला नाहरगड रेस्क्यू सेंटरमध्ये नेण्यात आले आहे, जिथे त्याला जंगलात सोडण्यापूर्वी प्राथमिक उपचार करण्यात आले. जवळच अमगढ आणि गलाता जंगले आहेत, त्यामुळे या भागात बिबट्या अन्न किंवा पाण्याच्या शोधात येणे ही नित्याची बाब आहे.
