अमेरिकेत पुन्हा एकदा बेछूट गोळीबाराची धक्कादायक घटना घडली आहे. एका हायस्कूलमध्ये मंगळवारी झालेल्या गोळीबारात ३ विद्यार्थ्यांचा मृत्यू झाला आहे.
एका हायस्कूलमध्ये मंगळवारी झालेल्या गोळीबारात ३ विद्यार्थ्यांचा मृत्यू झाला आहे. एका १५ वर्षीय विद्यार्थ्याने हा गोळीबार केला असल्याची माहिती समोर येत आहे. यामध्ये तिघांचा मृत्यू तर ८ विद्यार्थी जखमी झाल्याचं म्हटलं जात आहे. पोलिसांनी १५ वर्षीय हल्लेखोर विद्यार्थ्याला ताब्यात घेतलं आहे. त्याच्याकडून एक हँडगनसुद्धा जप्त करण्यात आली आहे.
शेरिफ कार्यालयाने दिलेल्या माहितीनुसार, ऑक्सफर्ड हायस्कूलमध्ये हा हल्ला झाला. दुपारनंतर झालेल्या या हल्ल्यात एका शिक्षकासह सहा जण जखमी झाले आहेत. डेट्रॉइटपासून जवळपास ६५ किमी अंतरावर असलेल्या ऑक्सफर्ड शहरात ही घटना घडली आहे. हल्ल्याचे नेमके कारण समजू शकले नाही.
काउंटीचे अंडरशेरिफ मायकल यांनी दिलेल्या माहितीनुसार, मृतांमध्ये १६ आणि १४ वर्षांची दोन मुले तर १७ वर्षांच्या एका मुलीचा समावेश आहे. इतर ८ जणांना गोळ्या लागल्या असून यात एका शिक्षकाचा समावेश आहे. जखमींपैकी २ गंभीर असून सहा जणांची प्रकृती स्थिर आहे.
शाळेत हल्ला करताना विद्यार्थ्याने जवळपास १५-ते २० राउंड गोळीबार केले. हल्लेखोर विद्यार्थ्याने एकट्याने हा गोळीबार केला असून त्यामागचे कारण आता पोलिस शोधत आहेत. गोळीबाराची घटना समजताच २५ एजन्सीज आणि जवळपास ६० अँब्युलन्स घटनास्थळी दाखल झाल्या होत्या. गेल्या वर्षभरात १०० हून अधिक गोळीबाराच्या घटना अमेरिकेत घडल्या. मात्र ऑक्सफर्ड स्कूलमधील ही घटना सर्वात मोठी होती अशीही माहिती मिळत आहे.
