जळगाव, लोकशाही न्यूज नेटवर्क
पत्नीच्या बनावट सह्या आणि कागदपत्र सादर करून बँक खात्यातून परस्पर पैसे काढणाऱ्या पतीविरोधात एमआयडीसी पोलीस ठाण्यात गुन्हा दाखल करण्यात आला आहे.
पाचोरा तालुक्यातील जोगे तांड येथील माहेर आलेल्या प्रतिभाबाई भोजू राठोड यांचा विवाह जळगाव तालुक्यातील रामदेव वाडी येथील भोजू बंद्री राठोड यांच्याशी ८ मे २०११ रोजी झाला आहे. दरम्यान लग्न झाल्यानंतर पती पत्नी हे दोन्ही जैन कंपनीत कामाला होत्या. त्यानंतर पती पत्नीचा कौटुंबिक वाद सुरू होता. हा वाद न्यायालयात पोहचल्याने प्रतिभाबाई ह्या २० मार्च २०१९ रोजी मुलाला घेवून माहेरी निघून गेल्या.
प्रतिभाबाई यांनी केलेल्या कामांचा पगार त्यांच्या खात्यात जमा होता. दरम्यान पती भोजू बंद्री राठोड याने ७ एप्रिल २०२० ते ८ जुलै २०२० दरम्यान, पत्नीच्या नावाच्या बनावट सह्या करून त्यांच्या वेळोवेळी खात्यातून एकुण ६२ हजार ४०० रूपये काढून घेतले. विवाहिता माहेरहून पैसे काढण्यासाठी जैन कंपनीसमोर असलेल्या एका बँकेत आले असता त्यांच्या खात्यात पैसे नसल्याचे समोर आले. त्यांनी अधिक चौकशी केली असता त्यांचे पती भोजू राठोड याने त्यांच्या नावाच्या बनावट सह्याकरून परस्पर पैस काढल्याचा प्रकार समोर आला.
याप्रकरणी विवाहितेने मंगळवारी १४ डिसेंबर रोजी एमआयडीसी पोलीस ठाण्यात धाव घेवून तक्रार दिली. त्यांच्या तक्रारीवरून संशयित आरोपी भोजू राठोड याच्याविरोधात गुन्हा दाखल करण्यात आला आहे. पुढील तपास सपोन अमोल मोरे करीत आहे.
