जळगाव : जिल्हाधिकारी डॉ अभिजित राऊत यांनी काढले अध्यादेश : ज्याअर्थी उपोद्घातात नमूद सार्वजनिक आरोग्य विभाग, मंत्रालय मुंबई यांचेकडील पत्र दिनांक 14 मार्च, 2020 अन्वये करोना विषाणू (कोव्हिड 19) चा प्रादुर्भाव रोखण्यासाठी राज्यात साथ रोग प्रतिबंधात्मक कायदा, 1897 हा दिनांक 13 मार्च 2020 पासून लागू करुन खंड 23 व 4 मधील तरतुदींच्या अंमलबजावणीसाठी अधिसूचना निर्गमित करणेत आलेली आहे आणि त्याबाबतची नियमावली प्रसिध्द केली असून जिल्हाधिकारी हे त्यांचे कार्यक्षेत्रात कोव्हिड 19 वर नियंत्रण आणण्यासाठी व त्याचा प्रादुर्भाव रोखण्यासाठी ज्या उपाययोजना करणे आवश्यक आहे त्या करण्यासाठी सक्षम प्राधिकारी म्हणून घोषित करण्यात आलेले आहेत. आणि ज्याअर्थी, उपोद्घातात नमूद शासन आदेश दिनांक 11 ऑगस्ट 2021 अन्वये कोविड-19 विषाणूच्या संसर्गामुळे महाराष्ट्र राज्यात लागू करण्यात आलेले निर्बंध काही प्रमाणात शिथिल करण्याबाबत निर्देश देण्यात आलेले आहेत. त्याअर्थी, मी अभिजीत राऊत, जिल्हाधिकारी तथा अध्यक्ष, जिल्हा आपत्ती व्यवस्थापन प्राधिकरण, जळगाव आपत्ती व्यवस्थापन कायदा, 2005, भारतीय साथरोग अधिनियम, 1897 अन्वये मला प्रदान करण्यात आलेल्या अधिकाराचा वापर करुन उपोद्घातात नमूद या कार्यालयाकडील दिनांक 03 ऑगस्ट, 2021 रोजीचा आदेश अधिक्रमीत करण्यात येत असून संपूर्ण जळगाव जिल्ह्याकरीता दिनांक 15 ऑगस्ट, 2021 पासून पुढील आदेश होईपावेतो खालील प्रमाणे आदेश पारीत करीत आहे.
1) उपहारगृहे / बार खुल अथवा बंदिस्त उपहारगृहे बैठक क्षमतेच्या 50% क्षमतेने खालील अटी व शर्ती नुसार सुरु राहतील.
अ) ग्राहकांना उपहारगृह / बार मध्ये प्रवेश करतांना प्रतिक्षा कक्षात अथवा जेवन मिळेपर्यंतच्या कालावधीत चेह-यावर मास्कचा वापर करणे बंधनकारक राहील. याबाबतच्या स्पष्ट सुचना संबंधित आस्थापना मालक / चालक यांनी उपहारगृह / बार मध्ये लावणे आवश्यक राहील.
ब) उपहारगृह / बार मध्ये काम करणारे आचारी, वाढपे, व्यवस्थापक व स्वच्छता कर्मचा-यांसह सर्व कर्मचा-यांचे कोविड प्रतिबंधक लसीकरण करणे आवश्यक राहील व ज्या कर्मचा-यांच्या लसीकरणाच्या दोन मात्रा आणि दुसरी मात्रा घेतल्यानंतर 14 दिवस पूर्ण झाले आहेत, असेच कर्मचारी व व्यवस्थापक उपहारगृह / बारमध्ये काम करु शकतील. तसेच यासर्व कर्मचारी व व्यव्यापक यांनी उपहारगृहात चेह-यावर मास्कचा वापर करणे अनिवार्य राहील. क) वातानुकुलित उपहारगृह / बार असल्यास, वायु विजनासाठी खिडक्या असल्यास कमीत कमी दोन खिडक्या किंवा दरवाजा उघडा ठेवून आतील हवा खेळती राहण्यासाठी पंखे लावणे आवश्यक राहील. ड) प्रसाधनगृहातही उच्च क्षमतेचा एक्झॉस्ट फॅन असणे आवश्यक राहील.
इ) उपहारगृह / बार मध्ये विहीत शारिरीक अंतराचे पालन होईल यानुसारच आसन व्यवस्था करण्यात यावी. फ) उपहारगृह बार मध्ये निर्जंतुकीकरणाची तसेच सॅनिटायझरची व्यवस्था असणे आवश्यक राहील. तसेच उपहारगृहे / बार सर्व दिवस रात्री 10.00 वाजेपर्यंत सुरु ठेवता येतील. तथापि भोजनासाठी ग्राहकांकडून शेवटची मागणी जास्तीत जास्त रात्री 09.00 वाजेपर्यंत घेता येईल. मात्र पार्सल सुविधा 24 तास सुरु ठेवता येईल.
2) दुकाने : अ) सर्व व्यापारी दुकाने दररोज रात्री 10.00 वाजेपर्यंत सुरु ठेवता येतील. दुकानात काम करणा-या सर्व व्यवस्थापक व कर्मचा-यांचे कोविड प्रतिबंधात्मक लसीकरणाचे दोन मात्रा पूर्ण व दुसरी मात्रा झाल्यानंतर 14 दिवसाचा कालावधी पूर्ण होणे आवश्यक राहील.
ब) सर्व दुकार्नाच्या प्रवेशाच्या ठिकाणी /काऊंटर समोर एका वेळी 5 पेक्षा जास्त ग्राहकांना प्रवेश राहणार नाही. तसेच पारदर्शक प्लास्टीक शिट, Face Shield यांचा वापर करावा. सदर पडद्यातून केवळ ग्राहकास वस्तूंची देवाण घेवाण करता येईल एवढीच मोकळी जागा ठेवण्यात यावी.
3) शॉपिंग मॉल्स :- शॉपिंग मॉल्स दररोज रात्री 10.00 वाजेपर्यंत सुरु ठेवता येतील. तथापि शॉपिंग मॉलमध्ये काम करणा-या सर्व व्यवस्थापक, कर्मचारी व प्रवेश करणा-या सर्व नागरिकांचे कॉविड प्रतिबंधात्मक लसीकरणाचे दोन मात्रा पूर्ण व दुसरी मात्रा झाल्यानंतर 14 दिवसाचा कालावधी पूर्ण झालेले आवश्यक राहील. लसीकरणाचे प्रमाणपत्रासोबत फोटो असलेले ओळखपत्र प्रवेशद्वारावर दाखवणे आवश्यक राहील.
4) जिम्नॅशिअम, योगा सेंटर, सलून, स्या सेंटर :- वातानुकूलित तसेच विनावातानुकूलित जिम्नॅशिअम, योगसेंटर, सलून स्पा सेंटर 50% क्षमतेने सर्व दिवस रात्री 10.00 वाजेपर्यंत सुरु ठेवता येतील. तथापि उक्त संस्था वातानुकूलित असल्यास, वायु विजनासाठी पंखा व वातानुकूलनासह खिडकी अथवा दरवाजा उघडा ठेवणे आवश्यक राहील.
5) इनडोअर स्पोर्टस : इनडोअर स्पोर्टस असलेल्या ठिकाणी खेळाडूंचे व तेथील कर्मचारी व्यवस्थापन यांचे कोविड प्रतिबंधात्मक लसीकरणाचे दोन मात्रा पूर्ण व दुसरी मात्रा झाल्यानंतर 14 दिवसाचा कालावधी पूर्ण झाले आवश्यक राहील. तसेच अशा ठिकाणी हवा खेळती राहण्यासाठी योग्य वायुविजन व्यवस्था असणे आवश्यक राहील व खेळाडूंना बॅडमिंटन, टेबलटेनिस, स्क्वॅश, पॅरलल बार, मलखांब अशाच प्रकारच्या खेळांसाठी केवळ दोन खेळाडू या मर्यादेत सुरु ठेवावेत.
6) कार्यालय / औद्योगिक आस्थापना / सेवाविषयक आस्थापना : अ) सर्व शासकीय /निमशासकीय आस्थापनांचे कर्मचारी बँक कर्मचारी, रेल्वे व म्युनसिपल कर्मचारी व व्यवस्थापन यांचे कोविड प्रतिबंधात्मक लसीकरण प्राथम्याने पूर्ण करण्यात यावे. ब) ज्या खाजगी व औद्योगिक आस्थापनांच्या कर्मचा-यांचे व व्यवस्थापनांचे कोविड प्रतिबंधात्मक लसीकरण पूर्ण झालेले असेल त्या आस्थापनांना पूर्ण क्षमतेने सुरु ठेवता येतील.
क) सर्व आस्थापनांनी गर्दी टाळण्यासाठी शक्यतो विविध सत्रात कर्मचा-यांना बोलावून कामाचे व्यवस्थापन करावे. ज्या आस्थापना वरील कर्मचा-यांना घरुन काम करणे शक्य आहे, अशा आस्थापनांच्या व्यवस्थापनांनी कर्मचा-यांना घरुन काम करण्याची मुभा द्यावी व कार्यालयात काम करणे आवश्यक असल्यास कर्मचा-यांचा गर्दीच्या वेळी प्रवास टाळणे शक्य होईल अशा प्रकारे कार्यालयीन वेळेचे व्यवस्थापन करावे.
ड) खाजगी कार्यालयांना वेळेचे व्यवस्थापन करण्यासाठी कार्यालये 24 तास सुरु ठेवता येतील. मात्र अशा सर्व व्यवस्थापनांतर्गत कार्यालयांना एका सत्रात कार्यालयातील एकूण कर्मचारी संख्येच्या 25 टक्के उपस्थिती मर्यादीत करणे आवश्यक राहील.
7) मैदाने, उद्याने स्थानिक प्राधिकरणाकडून विहीत करण्यात आलेल्या वेळेनुसार नियमित सुरु राहतील.
8) विवाह सोहळे : अ) खुल्या प्रांगणातील / लॉन वरील किंवा बंदिस्त मंगल कार्यालयातील विवाह सोहळे संबंधित प्रांगण / लॉन/ मंगल कार्यालय / हॉटेल मधील आसन क्षमतेच्या 50 टक्के क्षमतेने व कॉविड प्रतिबंधात्मक उपाययोनांचे संपूर्ण पालन होईल या अटीवर मंगल कार्यालयाच्या प्रयोजनार्थ सुरु ठेवता येतील. ब) खुल्या प्रांगण / लॉन मध्ये होणा-या विवाह सोहळ्यास उपस्थितांची संख्या जास्तीत जास्त 100 व्यक्ती या मर्यादेत राहील.
क) बंदिस्त मंगल कार्यालय / हॉटेलमध्ये उपस्थितांची संख्या क्षमतेच्या 50 टक्के परंतु जास्तीत जास्त 100 व्यक्ती या मर्यादेत राहील.
ड) कोणत्याही परिस्थितीत कोविड प्रतिबंधात्मक उपाययोजनांचे पालन केले जात आहे याची खातरजमा
करण्यासाठी व्हिडीओ रेकॉर्डिंग करणे व आवश्यकतेनुसार सक्षम प्राधिका-याला तपासणीसाठी उपलब्ध करुन देणे. आवश्यक राहील. या निर्बंधांचे उल्लंघन करणा-यांवर तसेच संबंधित हॉटेल / कार्यालयांवर दंडनीय कारवाई तसेच संबंधित हॉटेल / मंगल कार्यालयाचा परवाना रद्द करण्याची कार्यवाही करण्यात येईल.
इ) मंगल कार्यालय / हॉटेल / लॉन व्यवस्थापन / भोजन व्यवस्थापन / बँड पथक / भटजी / फोटोग्राफर्स अशा विवाह व्यवस्थेशी संबंधित सर्व संलग्न संस्था यामधील व्यवस्थापक व कर्मचारी यांचेही कोविड प्रतिबंधात्मक लसीकरण पूर्ण होऊन दुसरी मात्रा घेतल्यानंतर 14 दिवस पूर्ण होणे अनिवार्य राहील व त्यानुसार ओळखपत्रासह लसीकरण प्रमाणपत्र सोबत असणे आवश्यक राहील.
9) सिनेमागृहे व मल्टिप्लेक्स :- जिल्हयातील सर्व सिनेमागृह / नाट्यगृह, मल्टिप्लेक्स (स्वतंत्र व शॉपिंग मॉलमधील) बंद राहतील.
10) धार्मिक स्थळे :- जिल्ह्यातील सर्व धार्मिक स्थळे नागरिकांसाठी बंद राहतील.
11) आंतरराज्य प्रवास :- ज्या नागरिकांचे कोविड प्रतिबंधात्मक लसीकरण पूर्ण झाले आहे. त्या नागरिकांना बाहेरच्या राज्यातून महाराष्ट्र राज्यात प्रवेश करण्यासाठी RTPCR चाचणीची आवश्यकता नसेल. अन्य प्रवाशांसाठी 72 तास पूर्वीची RTPCR चाचणी निगेटिव्ह किंवा 14 दिवस विलगीकरण आवश्यक राहील.
12) कोविड प्रतिबंधात्मक उपाययोजना म्हणून राज्यात गर्दी व्यवस्थापन करण्याबाबत केंद्र शासनाने तसेच मा सर्वोच्च न्यायालयाने निर्देशित केले आहे. यास्तव गर्दी / जमाव टाळण्यासाठी वाढदिवस, राजकीय, धार्मिक, सामाजिक व सांस्कृतिक कार्यक्रम, निवडणूक प्रचार सभा, रॅली, मोर्चे इत्यादी वरील निर्बंध कायम राहतील.
13) नागरिकांनी सार्वजनिक ठिकाणी वावरतांना कोविड प्रतिबंधात्मक उपाययोजना उदा. मास्कचा वापर करणे, हातांची स्वच्छता, शारिरीक अंतराचे पालन करणे अनिवार्य राहील.
14) सर्व दुकाने, कार्यालये, औद्योगिक आस्थापना, उपहारगृहे, बार व मॉल मालक / व्यवस्थापनाने त्यांचे आस्थापनेवर कार्यरत असलेल्या व्यवस्थापक तसेच कर्मचा-यांचे कोविड प्रतिबंधात्मक लसीकरणाचे दोन मात्रा पूर्ण होऊन 14 दिवस झाल्याची खातरजमा करावी तसेच या कर्मचा-यांची यादी (लसीकरण माहिती / प्रमाणपत्रासह) तयार ठेवावी व सक्षम प्राधिका-यांनी तपासणीसाठी मागणी केल्यास त्यांना उपलब्ध करुन द्यावी.
15) दुकाने / उपहारगृहे / बार /मॉल्सचे / कार्यालये / औद्योगिक आस्थापना यांचे नियतकालीक निर्जंतुकीकरण व सॅनिटाईजेशन करण्याची जबाबदारी संबंधित मालकाची व व्यवस्थापनाची असेल. तसेच यामध्ये कर्मचारी तसेच ग्राहकांच तापमान घेण्यासाठी इन्फ्रारेड / कॉन्ट्रॅक्टलेस थर्मामिटर याची व्यवस्था करावी. तसेच यामध्ये मास्क डिस्पेंसर व बायोमेडीकल वेस्ट ( वापरलेले मास्क व टिशू पेपर्स इत्यादीची विल्हेवाट) जमा करण्याची व विहीत कार्यपध्दतीने विल्हेवाट करण्याची जबाबदारी संबंधित आस्थापनांची राहील.
या आदेशाची अंमलबजावणी करण्यास टाळाटाळ केल्यास अथवा उल्लंघन केल्यास संबंधितांविरुध्द आपत्ती व्यवस्थापन अधिनियम, साथरोग अधिनियम आणि भारतीय दंडसंहिता १८६० मधील तरतूदीनुसार कायदेशीर कारवाई करण्यात येईल.
संपूर्ण आदेश डाउनलोड करा : https://drive.google.com/file/d/1OvlMbAGgT4k08dSatLEa2GAM8RZQl6BO/view?usp=sharing
