खामगाव (प्रतिनिधी): शहर पोलिसांनी काल 19 मार्च रोजी दुपारी 4 वाजता सरकी लाईन भागातील खरेदी विक्री कॉम्प्लेक्समधील बुर्‍हाणी यांच्या दुकान नं.3 मध्ये व सायंकाळी 6 वाजताच्या सुमारास भुसावळ चौकात छापा टाकुन महाराष्ट्र शासनाने प्रतिबंधीत केलेला गुटखा जप्त केला आहे.
यामध्ये खरेदी विक्री कॉम्प्लेक्समधील दुकानामध्ये छापा टाकुन आरोपी राहुल गजानन देशमुख (29) रा.घाटपुरी याचेकडून 1 लाख 32 हजार 315 रूपयांचा शासन प्रतिबंधित गुटखा जप्त केला आहे. तर दुसर्‍या घटनेत भुसावळ चौकातील दुकानातून आरोपी शाम सुरेश घाटे (19) रा.बोबडे कॉलनी हा मोटर सायकल क्र.एमएच 28 एडी 8450 वरून प्रतिबंधीत गुटख्याची विक्री करता वाहतूक करित असतांना मिळून आला. त्याचे जवळून मोटरसायकल सह 49 हजार 102 रूपयांचा मुद्देमाल जप्त करण्यात आला आहे.
याप्रकरणी सरकारतर्फे अनुक्रमे पो.काँ संदीप जर्नाधन टेकाळे व पोहेकाँ गजानन विनायकराव बोरसे यांनी शहर पोलीस स्टेशनला दिलेल्या तक्रारीवरून दोघांविरूद्ध भादवी कलम 188, 269, 270, 272, 273 नुसार गुन्हा दाखल करण्यात आला आहे. याप्रकरणी शहर पोलीसांनी अन्न व औषध प्रशासन विभाग बुलडाणा यांना गुन्हा वर्ग केल्याची माहिती मिळाली आहे.
