आदेशानंतरही ट्रामा सेंटरमध्ये नॉन कोविड रुग्ण सेवा रखडली ; जिल्हा शल्यचिकित्सकांच्या आदेशाला केराची टोपली

भुसावळ  – शहरातील ट्रामा सेंटरला नॉन कोविड सुविधा मिळण्यासाठी भारतीय जनता पार्टी वैद्यकिय आघाडीचे संयोजक डॉ.नि.तु.पाटील यांनी केलेल्या मागणीनुसार जिल्हा शल्य चिकित्सक डॉ.नागोजी चव्हाण यांनी ११  नोव्हेंबर रोजी ट्रामा सेंटरला नॉन कोविड सेवा देण्याचे आदेश दिले होते मात्र तब्बल १० दिवस उलटूनही आदेशाचे पालन न झाल्याने स्थानिक प्रशासनाबद्दल संताप व्यक्त होत आहे.

भुसावळ ग्रामीण रुग्णालयामध्ये सध्या कोरोना संक्रमित रुग्ण आहेत तर ट्रामा सेंटरच्या इमारतीमध्ये केवळ आरटीपीसीआर चाचणी घेतल्या जातात. केवळ या चाचणीसाठी ट्रामा सेंटरची इमारत अडकवून ठेवण्यात आली होती. याबाबत भाजप वैद्यकीय आघाडीचे उत्तर महाराष्ट्र सहसंयोजक डॉ. नी. तू. पाटील यांनी केलेल्या मागणीनुसार ट्रामा सेंटर नॉन कोविड करून सेवा सुरू करण्यात आली आहे. या मागणीवर जिल्हा शल्य चिकित्सक डॉ.नागोजी चव्हाण यांनी 11 नोव्हेंबर रोजी आदेश देत ट्रामा सेंटर नॉन कोविड रुग्णांसाठी वापरण्याचे निर्देश दिले होते मात्र स्थानिक मुख्य वैद्यकिय अधिकारी डॉ.देवर्षी घोषाल यांनी याबाबत आदेश पाळले नाहीत. 11 दिवस उलटूनही ट्रामा सेंटरमध्ये नॉन कोविड सुविधा सुरु झालेली नाही. अद्यापही या ठिकाणी केवळ स्वॅब घेतले जात आहेत. या कामासाठी संपूर्ण इमारत अडकवून ठेवली जात आहे. याबाबत शनिवारी भारतीय जनता पार्टी वैद्यकिय आघाडीचे संयोजक डॉ.नी.तु.पाटील यांनी पाहणी कररून येथील दुर्दशेचीही पाहणी केली. या संदर्भात त्यांनी डॉ.चव्हाण यांच्याशी संपर्क साधून आदेशाची अंमलबजावणी का होत नाही? याबाबत तत्काळ कार्यवाही करुन रुग्णांना दिलासा द्यावा, अशी मागणीही डॉ.नी.तु.पाटील यांनी केली आहे.

ट्रामा केअर सेंटर नॉन कोविड सुविधा दिल्यास शहरातील सर्व पोलिस ठाण्यांना सुविधा मिळेल. सध्या शहरातील पोलिसांना आरोपी, कारागृहातील कैदी यांना वैद्यकीय तपासणीसाठी जळगाव येथील शिरसोली रोडवरील रुग्णालयात घेवून जावे लागते. यामुळे पोलिस यंत्रणेचा त्रास आणि वेळ वाया जातो. ट्रामा केअर सेंटरमध्ये इतर रुग्णासाठी उपचाराची सोय तसेच आरोपींची वैद्यकिय तपासणी सुरू झाल्यास पोलिसांना दिलासा मिळेल, अशी मागणीही भाजप वैद्यकीय आघाडी उत्तर महाराष्ट्र सहसंयोजक डॉ.नि. तु.पाटील यांनी केली आहे.