जळगाव, लोकशाही न्युज नेटवर्क
१७ वर्षीय अल्पवयीन मुलाने राहत्या घरात गळफास लावून आत्महत्या केल्याची धक्कादायक घटना जळगाव शहरातील सरस्वतीनगर येथून उघडकीस आली आहे.
याप्रकरणी शनीपेठ पोलीस ठाण्यात अकस्मात मृत्यूची नोद करण्यात आली. ध्रुव ललित बऱ्हाटे (वय १७, रा.सरस्वती नगर, भुसावळ रोड जळगाव) असे मयत तरुणाचे नाव आहे. आत्महत्या करण्याचे कारण अद्याप समोर आलेले नाही.
मिळालेल्या माहितीनुसार, ध्रुव बऱ्हाटे हा तरूण आई, वडील, लहान भाऊ यांच्यासह सरस्वती नगरमध्ये राहत होता. त्याचे वडील एका हॉटेलमध्ये कामगार म्हणून तर आई भंगाळे गोल्ड येथे काम करून परिवाराचा उदरनिर्वाह करीत असून ध्रुव हा इयत्ता बारावी विज्ञान शाखेमध्ये मु.जे. महाविद्यालय येथे शिक्षण घेत होता. गुरुवार २७ जून रोजी सकाळी नेहमीप्रमाणे ध्रुवचे आई-वडील हे कामाला निघून गेले. त्यानंतर सकाळी ध्रुव हा घरी एकटाच होता. त्याने घरामध्ये एका खोलीत स्वतःला गळफास लावून घेत आत्महत्या केली.
दरम्यान दुपारी १२ वाजेच्या सुमारास त्याचा लहान भाऊ शाळेतून घरी आला, त्यावेळेला भाऊ दरवाजा उघडत नाही म्हणून त्याने शेजारील नागरिकांना सांगितले. त्यावेळेला परिसरात राहणारे त्याचे नातेवाईक यांनी धाव घेतली. त्यांनी खिडकीतून पाहिले असता ध्रुव हा गळफास घेतलेल्या अवस्थेत दिसून आला.
त्यानंतर ध्रुव याला दरवाजा तोडून शासकीय वैद्यकीय महाविद्यालय व रुग्णालयात दाखल केले असता वैद्यकीय अधिकारी डॉ. माधुरी सोसे यांनी तपासणीअंती मयत घोषित केले.
शासकीय रुग्णालयामध्ये नातेवाईकांनी प्रचंड गर्दी केली होती. याप्रकरणी शनिपेठ पोलीस स्टेशनला अकस्मात मृत्यूची नोंद करण्याचे काम सुरू होते.
