जळगाव | शहरातील मानराज पार्क चौक जवळ सेवनिवृत्त नायब तहसीलदार यांच्या मोटारसायकलला भरधाव कंटेनरने धडक दिल्याने ते गंभीर जखमी झाले होते. आज पहाटे त्यांचा उपचारादरम्यान मृत्यू झाला आहे. अरुण महादु बागुल (वय-60) असे मृत सेवनिवृत्त नायब तहसीलदरांचे नाव आहे. दरम्यान, याप्रकरणी कंटेनर चालकाला अटक करण्यात आली आहे.
अरुण बागुल हे त्यांच्या दुचाकी (एम.एच.19.के.6227) ने गावातून मसाले खरेदी करुन घराकडे जात होते. बुधवार 3 जुलै रोजी सायंकाळी 6.30 वाजेच्या सुमारास मानराज पार्क चौक जवळ मागून येणाऱ्या भरधाव कंटेनरने (जी.जे. 27 व्ही.0024)ने त्यांना जोरदार धडक दिली. अपघात घडला त्यावेळी गुजराल पेट्रोलपंप चौकात ड्युटीवर असलेले वाहतुक पोलिस कर्मचारी मदतीला धावले. अरुण बागुल यांच्या दोन्ही पायावरुन ट्रकचे चाक गेल्याने त्यांना गंभीर अवस्थेत ट्रक खालून रविंद्र पाटील यांनी बाहेर काढले. त्यानंतर त्यांना रिक्षाने जिल्हा रुग्णालयात हलवण्यात आले. प्रकृती गंभीर असल्याने नातेवाईकांनी त्यांना खासगी रुग्णालयात उपचारासाठी दाखल केले. परंतू आज (गुरुवार) पहाटे दोन वाजेच्या सुमारास श्री.बागुल यांचा मृत्यू झाला.
याप्रकरणी कंटेनर चालक तस्वीर सिंग निरंजन सिंग (वय 60, अमुराद ता.अजनाद, जि.अमृतसर, पंजाब) याला रामानंदनगर पोलिसांनी अटक केली असून त्याच्याविरोधात गुन्हा दाखल करण्यात आला आहे.
