कुपवाडा:
कुपवाड्यातील मछिल सेक्टरमध्ये हिमस्खलनात भारतीय लष्कराचे तीन जवान शहीद झाले. तर एक जखमी झाल्याचे वृत्त आहे. काही दिवसांपूर्वीच बर्फवृष्टीनंतर हवामान विभागानं हिमस्खलनाचा इशारा दिला होता. त्यानंतर कुपवाड्यात तैनात असलेल्या सर्व जवानांना सतर्कतेच्या सूचना दिल्या होत्या.
वृत्तानुसार, लष्कराच्या कुपवाड्यातील मछिल सेक्टरमधील चौकीला हिमस्खलनाचा जोरदार तडाखा बसला. यात चौकी पूर्णपणे उद्ध्वस्त झाली. या दुर्घटनेत हवालदार कमलेश सिंह, नायक बलवीर आणि शिपाई राजिंदर हे तीन जवान शहीद झाले. तर एक जवान जखमी झाला आहे. त्याला रुग्णालयात दाखल करण्यात आलं आहे. दरम्यान, गेल्या महिन्यात कुपवाड्यात हिमस्खलनात ११ जणांचा मृत्यू झाला होता.
