मुक्ताईनगर : वारकरी संप्रदायातील भाविकांकरिता विशेष पर्वणी ठरणारा संत मुक्ताबाई संस्थान कोथळी – मुक्ताईनगर जि.जळगाव येथील 17 ते 24 फेब्रुवारी 2021 दरम्यान साजरा होणारा देगलुरकर फडाचा कीर्तन सप्ताह महोत्सव कोरोनामुळे रद्द करण्यात आला आहे.
श्रीसंत मुक्ताबाई संस्थान कोथळी- मुक्ताईनगर समाधीस्थळावर दरवर्षी वारकरी संप्रदायातील प्रख्यात जेष्ठ श्रेष्ठ कीर्तनकार ,फडकरी यांचे सहभागातून राज्यस्तरीय कीर्तन महोत्सवाचे आयोजन संत मुक्ताबाई संस्थान करित असते.या महोत्सवात राज्यातील हजारो भाविक उपस्थित असतात ज्ञानेश्वरी पारायण ,कीर्तन, प्रवचन ,भजनास नामवंत गुणीजन सेवा देतात.
यावर्षी 17 ते 24 फेब्रुवारीपर्यंत देगलुरकर फडाचे सहभागातून ह.भ.प. चैतन्य महाराज देगलुरकर यांचे ताटीचे अभंग निरूपण,ज्ञानेश्वरी पारायण व हभप.जयवंत महाराज बोधले,हभप.प्रमोदअण्णाजगताप ,ह.भ.प.माधवदास महाराज राठी, ह.भ.प.चंद्रशेखर महाराज देगलुरकर, हभप .महादेव महाराज राऊत,आदींची कीर्तने आयोजित केली होती आठ दिवस भाविकांना भरगच्च आध्यात्मिक मेजवानीच ठरणारी होती.
परंतू कोरोना महामारीचे पार्श्वभूमीवर संस्थानचे अध्यक्ष भैय्यासाहेब रवींद्र पाटील, हभप. रवींद्र महाराज हरणे, विनायकराव पाटील, उध्दव महाराज जुनारे, विलास संत यांनी पंढरपूर येथे हभप चैतन्य महाराज देगलुरकर यांची नुकतीच भेट घेवून चर्चा केली. यावर्षीचा कार्यक्रम रद्द करून पुढील वर्षांत 2022 मध्ये सप्ताह महोत्सव करण्याचे ठरले आहे. संत मुक्ताबाई अंतर्धान समाधी सप्तशतकोत्तर रौप्य महोत्सवी वर्षातच हा भव्यदिव्य कार्यक्रम साजरा होणार असल्याने भाविकांना वर्षभर वाट पाहावी लागणार आहे.
