जळगाव:- तालुक्यातील विटनेर येथे विजेचा शॉक लागून विवाहित महिलेचा जागीच मृत्यू झाल्याची घटना आज सकाळी घडली आहे. राणी दीपक मकासरे (वय २४, रा. जळके, ता.जळगाव) असे या महिलेचे नाव आहे. दरम्यान याबाबत एमआयडीसी पोलिसांत अकस्मात मृत्यूची नोंद करण्यात आलीय.
काल सायंकाळी चांगला पाऊस झाल्यामुळे शेतातील कामांसाठी राणी मकासरे या काही महिलांसह आज सकाळी 8 वाजेच्या सुमारास शेतात गेल्या होत्या. राणी मकासरे या सकाळी शेतात पोहोचल्यानंतर मजुरांना पिण्यासाठी पाणी घ्यायला विहिरीजवळ गेल्या. त्याच वेळी विहिरी जवळ असलेल्या इलेक्ट्रिक मोटरच्या लोखंडी पेटीला धक्का लागल्याने त्यांचा जागीच मृत्यू झाला. दरम्यान, शेतातील महिलांनी आरडा-ओरडा करून लोकांना बोलावले. परंतू तोपर्यंत उशीर झालेला होता. या घटनेबाबत एमआयडीसी पोलिसात अकस्मात मृत्यूची नोंद करण्यात आली आहे.
