पाचोरा (प्रतिनिधी) : पिंप्री हाट ता. भडगाव येथील नासिक येथे सैन्यात पी. टी. प्रशिक्षक पदावर सेवेत असलेल्या २६ वर्षीय जवानाचा पाचोरा तालुक्यातील नगरदेवळा शिवारातील विहरित मृतदेह आढळून आल्याने एकच खळबळ उडाली असून जवानाचा मृतदेह तब्बल ३३ तासांनंतर आढळून आला असून घटनेबाबत पाचोरा पोलीस ठाण्यात अकस्मात मृत्यूची नोंद करण्यात आली आहे. मयत जवानाचा १६ फेब्रुवारी २०२१ रोजी पाचोरा तालुक्यातील तारखेडा येथील युवतीशी विवाह झाला होता.
जवानाच्या मृत्यूमुळे पिंप्री हाट व तारखेडा या दोन गावांवर शोककळा पसरली आहे. अक्षय तृतीयाच्या आधल्या दिवशी भडगाव व जळगाव पोलिसांनी याच परिसरात जुगार अड्यावर छापा टाकून ३१ दुचाकींसह ८ लाख ८१ हजार रुपयांचा मुद्देमाल जप्त करून कारवाई केली होती. त्या घटनेचा जवानाच्या मृत्यूशी काही संबंध आहे की काय ? याबाबत उलट सुलट चर्चा असून याबाबतचे खरे वृत्त पोलिसांच्या चौकशीनंतरच बाहेर येणार आहे.
भडगाव तालुक्यातील पिंप्री हाट येथील प्रमोद दिनकर पाटील (वय – २६) हा २०१६ मध्ये सैन्यात भरती झाला होता. त्यानंतर नाशिक येथील पी. टी. सेंटरमध्ये प्रशिक्षक म्हणून गेल्या २ वर्षांपासून सेवा देत असतांना ४ मे रोजी त्याच्या चुलत भावाचा विवाह असल्याने तो ३ मे रोजी पिंप्री हाट येथे विवाहासाठी आला होता. यानंतर एक जूनला सुटी संपणार असल्याने प्रथमच पत्नीला नाशिक येथे सोबत घेऊन जाण्याचे स्वप्न त्याने रंगविले होते. मात्र दैवाला ते मान्य नसल्याने तो गुरुवारी सायंकाळी कोणास काही एक न सांगता घराबाहेर निघून आला. दरम्यान नगरदेवळा शिवारातील छबुलाल भिका चौधरी हे शनिवारी सकाळी ९ वाजता त्यांच्या शेतातील विहरीजवळ गेले असता त्यांना एक पुरुष जातीचा मृतदेह पाण्यावर तरंगत्या अवस्थेत आढळून आला. त्यांनी घटनेबाबतची माहिती नगरदेवळा ता. पाचोरा दुरक्षेत्राच्या पोलिसांना कळविली. दरम्यान प्रमोद पाटील हा घरी न असल्याने त्याच्या घरच्या मंडळी त्याचा शोध घेत फिरत होते. प्रमोद पाटील यांचा चुलत भाऊ समाधान संतोष पाटील हा घटनास्थळी पोचल्याने त्याने आपला चुलत भाऊ प्रमोदच असल्याचे ओळ्खल्यानंतर जोराने हंबरडा फोडला. घटनेबाबत समाधान पाटील यांनी पाचोरा पोलीस ठाण्यात तक्रार दिल्यानंतर अकस्मात मृत्यूची नोंद करण्यात आली असून मयताचे शवविच्छेदन ग्रामीण रुग्णालयाचे वैद्यकीय अधिकारी डॉ. अमित साळुंखे यांनी केले. मयताचे पश्चात आई, वडील, पत्नी, १ भाऊ, २ बहिणी असा परिवार आहे.
नगरदेवळाच्या क्लबवरील छाप्याबाबत तर्क वितर्क सुरू
नगरदेवळा ता. पाचोरा येथील बाबूलाल भिका चौधरी यांच्या शेतातील केळीच्या बागेत पत्याचा मोठा क्लब सुरू असल्याची माहिती पोलीस अधीक्षक प्रवीण मुंढे यांना गुप्तपणे मिळाली होती. त्या जुगार अड्यावर गुरुवारी मध्यरात्री जळगाव येथील एस. आर. पी. प्लाटुन पथक व भडगाव पोलीस ठाण्याचे पोलीस निरीक्षक अशोक उतेकर यांच्या नेतृत्वाखाली जुगार अड्यावर धाड टाकून ७ लाख ५१ हजार रुपये किमतीच्या ३१ दुचाकी, १ लाख २१ हजार ५८० रुपये रोख जप्त करून २१ जुगारींवर कारवाई करण्यात आली होती. नेमके त्याच शेत मालकाच्या शेतात प्रमोद पाटील या सैनिकाचा मृतदेह आढळून आल्याने त्या घटनेशी याचा संबंध आहे की काय ? याबाबत चर्चेला उधाण आले असून पोलिसांच्या चौकशी नंतरच जवानाच्या मृत्यूचे खरे कारण स्पष्ट होणार आहे. घटनेचा तपास पोलीस उपनिरीक्षक दत्तात्रय नलावडे हे करीत आहेत.
