गुरुग्राम :
पद्मावत विरोधी आंदोलनादरम्यान शाळेच्या बसवर हल्ला करणाऱ्या १८ जणांना पोलिसांनी अटक केली आहे. या सर्वांना न्यायालयात हजर करण्यात आले असता १४ दिवसांची न्यायालयीन कोठडी देण्यात आली आहे.
पद्मावत चित्रपटाला विरोध करणाऱ्या जमावाने बुधवारी दुपारी सोहना रोडवरील घमरोज गावात शाळेच्या बसला लक्ष्य केले होते. या बसमध्ये ३० विद्यार्थी आणि ३ शिक्षिका होत्या. जमावाच्या दगडफेकीत बसच्या काचा फुटल्या आणि बसमधील सगळ्यांचीच भीतीने गाळण उडाली. सीटवर बसलेल्या विद्यार्थ्यांनी खाली लपून कसाबसा जीव वाचवला. या भ्याड कृत्याचा सर्वच स्तरांतून निषेध होत असताना पोलिसांनी संबंधित आंदोलकांवर कारवाईचा बडगा उगारला असून १८ जणांना अटक करण्यात आली आहे.
दरम्यान, गुरुग्राम जिल्ह्यात २८ जानेवारीपर्यंत जमावबंदी लागू करण्यात आली असून संवेदनशील ठिकाणी अतिरिक्त पोलीस बंदोबस्त ठेवण्यात आला आहे, असे पोलीस उपायुक्त विनय प्रताप सिंह यांनी सांगितले.
