पारोळा, लोकशाही न्यूज नेटवर्क
राष्ट्रीय महामार्गावर सांगवी फाट्याजवळ ट्रकने दुचाकीला मागून जोरात धडक दिल्याने झालेल्या अपघातात तरुणाच्या जागीच मृत्यू झाल्याची दुर्दैवी घटना आज शनिवारी दुपारी चारच्या सुमारास घडली. योगेश सयाजी पाटील, वय ४१ रा. सांगवी ह. मु. शिक्षक कॉलनी चाकण, पुणे असे मृत तरुणाचे नाव आहे.
तरुण योगेश पाटील हा चाकण, पुणे येथे नोकरीस होता. तो आपल्या सांगवी गावी एका अंत्यविधीच्या कार्यक्रमासाठी आला होता. पुणे येथे परत जाण्यासाठी तो आज मोटर सायकल क्र. एमएच १९ सीक्यू ४०५३ ने पारोळा शहरामध्ये ट्रॅव्हल चे तिकीट बुक करण्यासाठी घरून निघाला होता. यावेळी सांगवी फाट्याजवळ भरधाव मालवाहू ट्रक क्र. जीजे ११ वीवी ९२९१ ने तरुणाच्या मोटरसायकलला मागून जोरात धडक दिल्यावर तो चाकात येऊन चिरडल्याने जागीच गतप्राण झाला.
याबाबत आंनद पाटील यांनी दिलेल्या फिर्यादीवरून ट्रक चालकाविरुद्ध (नाव गाव माहीत नाही) पोलिसांत गुन्हा दाखल करण्यात आला आहे. घटनेचा अधिक तपास पोलीस करीत आहे. घटनेची माहिती मिळताच डीवायएसपी विनायक कोते, पोलीस निरीक्षक दीपक पाटील हवालदार डॉ. शरद पाटील आदींनी घटनास्थळी भेट देऊन झालेली वाहतूक कोंडी सुरळीत केली. या घटनेने सांगवी गावात शोककळा पसरली असून हळहळ व्यक्त होत आहे.
