चोपडा, लोकशाही न्यूज नेटवर्क
तालुक्यातील धानोरा येथे चहाच्या टपरीवर झालेल्या वादाचा राग मनात धरून एका 22 वर्षीय तरुणावर चॉपरने जीवघेणा हल्ला केल्याची धक्कादायक घटना घडली आहे. याप्रकरणी अडावद पोलीस स्टेशनमध्ये सहा जणांविरुद्ध खुनाचा प्रयत्न केल्याचा गुन्हा दाखल करण्यात आला आहे.
फिर्यादी गणेश गुलाब सोनवणे (वय 22, रा. कोळीवाडा, धानोरा) आणि आरोपींमध्ये दि. 5 एप्रिल रोजी सायंकाळी 7:30 च्या सुमारास शिवतांडव टी हाऊस येथे किरकोळ वाद झाला होता. या वादाचा राग मनात धरून, त्याच रात्री 9:30 वाजेच्या सुमारास बसस्थानक चौकात आरोपींनी गणेशला गाठले. यावेळी मुख्य संशयित आरोपी गणेश हिम्मत कोळी (रा. मोहाडी, ता. जळगाव) याने आपल्या जवळील चॉपरने गणेश सोनवणे याच्या पोटावर, डाव्या कोपरावर आणि पाठीवर सपासप वार केले.
या हल्ल्यात गणेश गंभीर जखमी झाला असून, त्याला जीवे मारण्याचा प्रयत्न करण्यात आला. फिर्यादीने दिलेल्या तक्रारीवरून सहा जणांवर गुन्हा नोंदवण्यात आला आहे. गणेश हिम्मत कोळी (रा. मोहाडी, ता. जळगाव), जितेंद्र तायडे, गोपीचंद कोळी, भूषण लोटू कोळी, गौरव कोळी, वैभव भोई (सर्व रा. धानोरा, ता. चोपडा) यांच्यावर गुन्हा दाखल आहे. या घटनेची माहिती मिळताच अडावद पोलीस स्टेशनचे सहाय्यक पोलीस निरीक्षक प्रमोद वाघ यांनी तातडीने तपास चक्र फिरवली.
दि. 6 एप्रिल रोजी रात्री मुख्य आरोपीला अटक करण्यात आली आहे. सदर कारवाई अमळनेर विभागाचे उपविभागीय पोलीस अधिकारी विनायक कोते यांच्या मार्गदर्शनाखाली करण्यात आली आहे. पोलिसांनी घटनेचा पंचनामा केला असून पुढील तपास सहाय्यक पोलीस निरीक्षक प्रमोद वाघ करत आहेत.
