पारोळा, लोकशाही न्यूज नेटवर्क
तालुक्यातील शिरसमणी येथील एका 32 वर्षीय तरुणाचा छातीत अचानक तीव्र वेदना होऊन उपचारादरम्यान दुर्दैवी मृत्यू झाल्याची घटना घडली आहे. या प्रकरणी पारोळा पोलीस ठाण्यात अकस्मात मृत्यूची नोंद करण्यात आली आहे.
पोलीस सूत्रांकडून मिळालेल्या सविस्तर माहितीनुसार, चेतन दैवत पाटील (वय 32, रा. शिरसमणी, ता. पारोळा) असे मृत तरुणाचे नाव आहे. दि. 1 ऑगस्ट 2026 रोजी सकाळी 9 वाजेच्या सुमारास चेतन याने त्याच्या कुटुंबीयांना छातीत दुखत असल्याचे आणि ॲसिडिटी झाल्याचे सांगितले. त्यानंतर त्याने ॲसिडिटीची गोळी घेतली व त्याचा त्रास काहीसा कमी झाल्याचे त्याने सांगितले. मात्र, सकाळी 9.30 वाजेच्या सुमारास चेतन याच्या छातीत पुन्हा तीव्र वेदना सुरू झाल्याने तो जोराने रडू लागला.
परिस्थितीचे गांभीर्य लक्षात घेऊन त्याच्या वडिलांनी गावातील गोकुळ गिरधर पाटील, विकास संजय पाटील आणि भय्या नाना पाटील यांच्या मदतीने त्याला खाजगी वाहनाने पारोळा येथील पाटील हॉस्पिटलमध्ये सकाळी 10 वाजेच्या सुमारास दाखल केले. डॉ. संकेत खैरे यांनी प्राथमिक पाहणी करून चेतन याला पुढील उपचारासाठी पारोळा येथील कुटीर रुग्णालयात संदर्भित केले. त्यानंतर कुटीर रुग्णालय येथे आणले असता तेथील वैद्यकीय अधिकाऱ्यांनी सकाळी 10.30 वाजता चेतन यास तपासून मृत घोषित केले.
या प्रकरणी मृत तरुणाच्या वडिलांच्या माहितीवरून पारोळा पोलीस ठाण्यात नोंद क्रमांक 80/2026 नुसार भारतीय नागरिक सुरक्षा संहिता कलम 194 अन्वये अकस्मात मृत्यूची नोंद करण्यात आली आहे. घटनेची माहिती मिळताच पोलीस निरीक्षक दीपक पाटणल यांनी तपासाचे निर्देश दिले. या घटनेचा पुढील सखोल तपास पोलीस नाईक चंद्रशेखर सोनवणे करत आहेत.
