जळगाव
जळगाव शहरातील ममुराबाद रस्त्यावर प्रजापती नगराजवळ सोमवारी कावड यात्रेदरम्यान भीषण अपघात झाला. देवीच्या मंदिरातून दर्शन घेऊन बाहेर पडणाऱ्या दहा वर्षीय चिमुकल्याला भरधाव ट्रकने धडक दिल्याने त्याचा घटनास्थळीच मृत्यू झाला. या घटनेनंतर संतप्त जमावाने ट्रक पेटवून दिला तसेच चालकाला मारहाण केली. जमावाने रास्ता रोको केल्याने काही काळ दोन्ही बाजूंची वाहतूक ठप्प झाली होती.
मयत मुलाचे नाव प्रबल राजू गवळी असून तो दहा वर्षांचा होता. तो गवळीवाडा, शनिपेठ येथे राहत होता. कावड यात्रेच्या पार्श्वभूमीवर ममुराबाद रस्त्यावर भाविकांची मोठी वर्दळ होती. याचदरम्यान प्रजापती नगराजवळील देवीच्या मंदिरातून दर्शन घेऊन बाहेर पडताना प्रबलला ट्रकने धडक दिली. धडक एवढी भीषण होती की त्याचा जागीच मृत्यू झाला.
अपघातानंतर संतप्त नागरिकांनी घटनास्थळी गर्दी करत रास्ता रोको केला. जमावाने ट्रकचालकाला त्यांच्या ताब्यात देण्याची मागणी केली. संतप्त जमावाने ट्रक पेटवून दिला. घटनेचे मोबाईलवर चित्रीकरण करणाऱ्या काही व्यक्तींनाही जमावाने मारहाण केल्याची माहिती आहे. त्यामुळे परिसरात काही काळ तणावाचे वातावरण निर्माण झाले.
अपघातातील ट्रकचालकाचे नाव उबेद खान इकबाल खान पठाण असून त्याचे वय 34 वर्षे आहे. तो चोपडा येथील रहिवासी आहे. संबंधित ट्रक जळगाव ते चोपडा या मार्गावर किराणा माल व रेशन वाहतूक करीत होता. ट्रकचे मालक भूपेंद्र नटवरलाल गुजराती असून वाहन क्रमांक एमएच-20-ईजी-3593 आहे. ट्रक आईसर कंपनीचा आहे.
घटनेनंतर पोलिसांनी घटनास्थळी बंदोबस्त तैनात करून जमावाला पांगविण्याचा प्रयत्न केला. मारहाण झाल्यामुळे ट्रकचालकाला रुग्णालयात दाखल करण्यात आले असून त्याच्या सुरक्षेसाठी पोलिस बंदोबस्त ठेवण्यात आला आहे. मयत मुलाचा मृतदेह सिव्हिल रुग्णालयात हलविण्यात आला असून गुन्हा दाखल करण्याची प्रक्रिया सुरू आहे. ट्रकला लागलेली आग विझविण्यात आली.
अग्निशमन बंबाला परत जावे लागले
बालकाला चिरडणारा ट्रक पूर्ण खाक व्हावा म्हणून संतप्त जमावाने ट्रक विझवण्यासाठी अग्निशमन बंबदेखील जावू दिला नाही, त्यामुळे अग्निशमन बंबाला परत जावे लागले. रास्ता रोको आंदोलनामुळे रस्त्यावरील दोन्ही बाजूने वाहतूक ठप्प होऊन वाहनांच्या रांगा लागल्या होत्या. आता रस्ता रोको आंदोलन मागे घेतल्यानंतर पोलिसांकडून वाहतूक सुरळीत करण्याचे काम सुरू आहे. ट्रक चालकाने तब्बल पन्नास मीटर पर्यंत बालकाला चिरडल्यावर फरफटत नेल्याने जमाव संतप्त झाला होता.
पाळधी बायपास दीड महिन्याने सुरु होणार
दरम्यान, या घटनेच्या पार्श्वभूमीवर ममुराबाद रस्त्यावरील वाहतुकीचा प्रश्न पुन्हा ऐरणीवर आला आहे. येत्या 26 ऑगस्ट रोजी सायंकाळी 4 वाजता जिल्हाधिकारी, पोलिस अधीक्षक, एनएचएआय (नही) अधिकारी आणि पत्रकारांच्या उपस्थितीत पाळधी बायपासवरील वाहतुकीची पाहणी करण्यात येणार आहे. त्यानंतर वाहतुकीसंदर्भात उपाययोजनांवर चर्चा होणार आहे. घटनेनंतर पोलिस अधीक्षकांनी एनएचएआय (नही) आणि सार्वजनिक बांधकाम विभागाच्या अधिकाऱ्यांशी चर्चा करून वाहतूक सुरळीत करण्याबाबत उपाययोजना करण्याचे निर्देश दिल्याची माहिती आहे. एनएचएआयच्या माहितीनुसार संबंधित महामार्ग आणखी सुमारे दीड महिना सुरू होण्याची शक्यता नसल्याने बायपासवरील वाहतुकीचा प्रश्न महत्त्वाचा ठरणार आहे. या अपघाताच्या घटनेचा पुढील तपास जळगाव पोलिसांकडून सुरू आहे.
