यावल, लोकशाही न्यूज नेटवर्क
मंगळवारी पहाटे दुकानाला भीषण आग लागल्याची घटना शहरातील फैजपूर रस्त्यावर विस्तारित भागातील हरिओम नगरात घडली. या आगीत दुकानातील सर्व साहित्य जळून खाक झाल्याने १४ लाखांचे नुकसान झाले. आगीचा फटका शेजारील घराला देखील बसला. शेजारील घराचे खिडकी, दरवाजे देखील जळून ३९ हजारांचे नुकसान झाले. या आगीचा पंचनामा महसूल विभागाकडून करण्यात आला असून शॉर्ट सर्किटमुळे आग लागली असावी असा प्राथमिक अंदाज आहे.
मिळालेल्या माहितीनुसार, यावल शहरात फैजपूर रत्यावरील विस्तारित भागातील हरिओम नगरात संजेरी ग्लास हे शेख जाकीर शेख कमरोद्दिन, शेख अत्तमस शेख जाकीर यांचे दुकान आहे. या दुकानाला मंगळवारी पहाटेपूर्वी अचानक आग लागली. या आगीमध्ये दुकानातील प्लायवूड तसेच अल्युमिनियमच्या खिडक्या, दरवाजे तयार करणारे प्लायवूड कटिंग करणारे तसेच अल्युमिनियम कटिंग करणाऱ्या विविध प्रकारच्या मशिनरी, अल्युमिनियमच्या सीट, प्लायवूडचे शीट, तयार झालेते खिडक्या दरवाजे तसेच काच व फर्निचर जळून खाक झाले. आग लागल्याचे निदर्शनास येताच अग्निशमन दलाला माहिती देण्यात आली.
यावल नगरपालिकेचे अग्निशामक वाहनचालक कैलास काटकर, फायरमन शाहरुख खाटीक, दिनेश धारू यांनी या ठिकाणी जाऊन आग आटोक्यात आणली. मात्र, तोवर सर्व साहित्य जळून खाक झाले. तहसीलदार मोहनमाला नाझीरकर यांच्या मार्गदर्शनाखाली मंडळाधिकारी मीना तडवी, तलाठी गजानन पाटील, प्रदीप पाटील, ज्ञानेश्वर पाटील यांनी या ठिकाणी पंचनामा केला. आगीमध्ये दुकानदाराचे १४ लाख, सात हजार रुपयांचे साहित्य जळाल्याचा पंचनामा करण्यात आला. पोलीस स्टेशनला घटनेची नोंद करण्यात आली आहे.
