नाशिक
राष्ट्रवादी काँग्रेसचे जेष्ठ नेते व मंत्री छगन भुजबळांचे पुत्र पंकज भुजबळ यांना विधान परिषदेची आमदारकी मिळाल्यानंतर महायुतीतील वाद शांत होईल असे चित्र असतांना पुतणे समीर भुजबळ यांनी पुन्हा नांदगावमध्ये शिवसेनेचे आमदार सुहास कांदे यांच्याविरोधात दंड थोपटले आहेत. नांदगावमधून उमेदवारी मिळवण्यासाठी समीर भुजबळांनी राष्ट्रवादी शरदचंद्र पवार पक्ष आणि शिवसेना उबाठाच्या संपर्कात असल्याची चर्चा आहे. महायुतीचा घटक पक्षाचे आमदार असतांनाही समीर भुजबळांनी उमेदवारासाठी नांदगावमध्ये चाचपणी सुरू केल्याने महायुतीत पुन्हा वादाची ठिणगी पडण्याची शक्यता आहे.
राज्यात महायुती एकत्र लढत असतानाच, नाशिकमध्ये मात्र महायुतीतील राष्ट्रवादी काँग्रेस आणि शिवसेनेतील वाद पुन्हा उफाळून आला आहे. नांदगाव विधानसभा मतदारसंघ हा शिवसेनेकडे असून, सुहास कांदे या ठिकाणी आमदार आहेत. कांदे यांनी मतदारसंघ पिंजून काढत, पुन्हा निवडणुकीची तयारी सुरू केली असतांना आता छगन भुजबळांचे पुतणे समीर भुजबळ यांनी या मतदारसंघातून निवडणूक लढवण्याची तयारी केली. यापूर्वी पंकज भुजबळ यांनी दोनवेळा या मतदारसंघाचे नेतृत्व केले. परंतु, गेल्या वेळी कांदेंनी त्यांचा दारुण पराभव केला. त्यानंतर आता निवडणुकांच्या तोंडावर नांदगावच्या राजकारणात समीर भुजबळांनी शड्डू ठोकत विविध कार्यक्रमाचे आयोजन सुरू केले होते.परंतु, महायुतीच्या वरिष्ठ नेत्यांनी हस्तक्षेप केल्यानंतर मधल्या काळात वाद शमला होता.
