लोकशाही न्यूज नेटवर्क
२०२३ च्या विश्वचषकाची सुरुवात यजमान भारताच्या विजयाने झाली आहे. भारतीय संघाने सोप्या २०० धावांच्या आव्हानाचा पाठलाग करताना केवळ २ धावांवर तीन फलंदाज गमावले होते. कर्णधार रोहित शर्मा, ईशान किशन आणि श्रेयस अय्यर याना खाते देखील उघडता आले नाही. मग अडचणीत सापडलेल्या इंडियाला सावरण्याची जबाबदारी मात्र विराट कोहलीच्या खांद्यांवर आली. विराट आणि लोकेश राहुल यांनी शानदार भागीदारी करत टीम इंडियाला विजय मिळवून दिला. या विजयानंतर टीम इंडियाच्या ड्रेसिंग रूममध्ये एक वेगळेच दृश्य पाहायला मिळाले, ज्याचा व्हिडीओ सोशल मीडियावर मोठ्या प्रमाणात व्हायरल होत आहे.
दरम्यान, भारतीय संघ व्यवस्थापनाने सामन्यातील सर्वोत्तम क्षेत्ररक्षकाचा सन्मान करण्याचा निर्णय घेतला. सामना संपल्यानंतर टीम इंडियाच्या ड्रेसिंग रूममध्ये विराट कोहलीला सर्वोत्तम क्षेत्ररक्षक म्हणून सुवर्ण पदक देऊन सन्मानित करण्यात आले. यादरम्यान कोहलीनेही पदक तोंडात धरून जोरदार सेलिब्रेशन केले. किंह कोहलीच्या भन्नाट सेलिब्रेशनचा व्हिडीओ बीसीसीआयने शेअर केला आहे.
