शेतकऱ्यांच्या कर्जमाफी साठी वरोऱ्यात आंदोलन
चंद्रपूर, लोकशाही न्यूज नेटवर्क
जिल्ह्यातील वरोऱ्यात असंख्य शेतकरी बांधवांच्या उपस्थितीत नागपुर-चंद्रपूर महामार्गावर आज “चक्काजाम आंदोलन” करण्यात आले. या आंदोलनात शेतकऱ्यांनी अतिवृष्टीमुळे महाराष्ट्रात बळीराजा मोठ्या संकटात असला, तरीही महायुती सरकारने मोठमोठ्या वल्गना देऊन फक्त रिकाम्या आश्वासनांमध्ये लोकांचा वेळ वाया घालवला आहे, असा संताप व्यक्त केला. निवडणुकीपूर्वी भाजपाने “सातबारा कोरा… कोरा… कोरा…” अशी घोषणा केली होती; पण ती अंतर्भूत आश्वासने पूर्ण न झाल्याने सरकारने शेतकऱ्यांना वाऱ्यावर सोडल्याचा या आंदोलनात आरोप केला गेला.
शेतकरी संघटनांनी या आंदोलनातून राज्य सरकारला तातडीने ओला दुष्काळ जाहीर करण्याची आणि शेतकऱ्यांची सरसकट कर्जमाफी करण्याची मागणी केली.तसेच, चंद्रपूर जिल्ह्यातील सोयाबीन उत्पादक शेतकऱ्यांना विशेष पॅकेज जाहीर करून कापूस उत्पादकांना प्रति हेक्टर १ लाख रुपये तर सोयाबीन उत्पादकांना प्रति हेक्टर ५० हजार रुपयांची नुकसानभरपाई द्यावी, अशी ठाम भूमिका मांडण्यात आली आहे.
या आंदोलनास चंद्रपूर शहर काँग्रेस कमिटीचे अध्यक्ष श्री. रितेश तिवारी, अल्पसंख्याक सेलचे जिल्हाध्यक्ष सोहेलभाई रजा, वरोरा तालुकाध्यक्ष मिलिंद भोयर, भद्रावती तालुकाध्यक्ष प्रशांत काळे, तसेच वरोरा व भद्रावती शहराध्यक्ष विलास टिपले व सूरज गावंडे, तसेच अनेक काँग्रेस पदाधिकारी, कार्यकर्ते, शेतकरी व स्थानिक नागरिक उपस्थित होते.
शेतकऱ्यांचे कुटुंब अतिवृष्टीमुळे उद्ध्वस्त झाले असून त्यांच्या न्यायासाठी हा संघर्ष आवश्यक असल्याचा संदेश या चक्काजाम आंदोलनातून देण्यात आला. सरकारकडून होणाऱ्या धोरणात्मक दुर्लक्षाला विरोध नोंदवून, तातडीने शासकीय योजनेची मागणी करीत या आंदोलनातून शेतकऱ्यांच्या हितासाठी ठोस उपाय योजण्याची मागणी जोरदारपणे यावेळी केली गेली.
