लोकशाही संपादकीय लेख
जळगाव जिल्ह्यातील वरणगाव येथील लोकनियुक्त नगराध्यक्ष सुनील काळे यांना नगराध्यक्षपदाची धुरा सांभाळून दहा महिने झाले आहेत. या दहा महिन्यांच्या कालावधीत वरणगाव शहराच्या विकासासाठी जो निधी मिळाला पाहिजे, तो मिळत नाही, असे त्यांचे म्हणणे आहे. ६० हजार लोकसंख्या असलेल्या वरणगाव शहराच्या विकासासाठी शासनाकडून निधी मिळत नसल्याने शहराचा विकास शून्य होत आहे. शहरातील रस्ते, शहरातील पाणीपुरवठा, शहराची स्वच्छता आणि आरोग्य, शहरातील विजेचे व्यवस्थापन यासाठी दैनंदिन जो पैसा लागणार आहे, तो मिळत नाही. वरणगाव शहरातून महामार्ग गेला आहे. त्या महामार्गावरील डिव्हायडरचा प्रश्न सुटत नाही. त्यामुळे वाहतूक व्यवस्था विस्कळीत होते. वाहतुकीची कोंडी होऊन अपघात होत आहेत. हे टाळायचे असेल, तर त्यासाठी निधी लागणार आहे, जो निधी मिळत नाही. त्याचबरोबर महामार्गाच्या उड्डाणपुलाखाली दैनंदिन बाजार भरवावा, ही मागणी जुनीच आहे. त्याला रस्ते वाहतूक मंत्री नितीन गडकरी यांनी मंजुरी दिली आहे; परंतु तेथे बाजार भरवला जात नाही, ही शोकांतिका आहे. या सर्व बाबींसाठी निधी लागणार आहे, जो निधी शासनाकडून मिळावा, या मागणीसाठी नगराध्यक्ष सुनील काळे हे सायकलवरून वरणगावहून जळगावला जिल्हाधिकारी कार्यालयात जाऊन जिल्हाधिकारी रोहन घुगे यांना निवेदन दिले. वरणगावच्या विकासाकडे लक्ष वेधण्यासाठी मी हा सायकलवरचा प्रवास केला, असे ते म्हणतात. जिल्हाधिकारी आमचे म्हणणे पूर्ण ऐकून घेतील. तसेच पालकमंत्री गुलाबराव पाटील, जलसंपदामंत्री गिरीश महाजन, वस्त्रोद्योग मंत्री संजय सावकारे, केंद्रीय राज्यमंत्री रक्षा खडसे यांनी आमच्या मागण्यांचा सहानुभूतीपूर्वक विचार करतील आणि आम्हाला वरणगावच्या विकासासाठी निधी उपलब्ध करून देण्यास मदत करतील, अशी आशा सुनील काळे यांनी व्यक्त केली आहे. पाहूया काय होते ते.

