नवी दिल्ली, लोकशाही न्यूज नेटवर्क;
इराक मधून एक अत्यंत हृदयद्रावक बातमी समोर आली आहे. इराकच्या उत्तरेकडील शहर असलेल्या एरबिल येथील विद्यापीठाच्या वसतिगृहाला भीषण आग लागल्याची घटना शुक्रवारी 8 डिसेंबर सायंकाळी ८ च्या सुमारास घडली आहे. याआगीत 14 जणांचा मृत्यू झाला असून 18 जण जखमी झाले आहेत. प्राथमिक तपासात शॉर्ट सर्किटमुळे आग लागल्याचे सांगण्यात येत आहे.
याबाबत तेथील स्थानिक वृत्तसंस्थांनी दिलेल्या माहितीनुसार, एरबिल शहराच्या पूर्वेला असलेल्या सोरान या शहरात एका वसतिगृहाच्या इमारतीला भीषण आग लागली. ज्यामध्ये १४ विद्यार्थ्यांचा होरपळून मृत्यू झाला तर १८ विद्यार्थी जखमी झालेत. सोरानच्या आरोग्य निदेशालयाचे प्रमुख कामराम मुल्ला मोहम्मद यांच्या म्हणण्यानुसार, प्राथमिक तपासात शॉर्ट सर्किटमुळे आग लागल्याचे सांगण्यात येत आहे. कुर्दिस्तानचे पंतप्रधान मसरूर बरझानी यांनी या घटनेबाबत चौकशी समिती स्थापन केली आहे. दरम्यान अग्निशमन दलाच्या अथक प्रयत्नानंतर रात्री उशिरा ही आग विझवण्यात आल्याची माहिती समोर आली.