जळगाव, लोकशाही न्यूज नेटवर्क
भुसावळ तालुक्यातील साकेगाव येथील बसस्थानकावर जुन्या वादातून दोन तरुणांवर धारदार शस्त्राने हल्ला झाल्याची घटना मंगळवारी (दि. २९) रात्री आठ वाजेच्या सुमारास घडली. या हल्ल्यात राहुल संतोष कोळी (वय २४) आणि कुणाल बाळू वाघ (वय २३, दोन्ही रा. साकेगाव) हे गंभीर जखमी झाले आहेत. त्यांच्यावर डॉ. उल्हास पाटील रुग्णालयात उपचार सुरू असून, त्यापैकी एकाची प्रकृती चिंताजनक असल्याची माहिती आहे.
राहुल कोळी आणि कुणाल वाघ हे दोघे साकेगावातील एकाच गल्लीत वास्तव्यास असून हातमजुरी करून कुटुंबाचा उदरनिर्वाह करतात. मंगळवारी रात्री दोघेही उपचारासाठी गोदावरी फाउंडेशनच्या डॉ. उल्हास पाटील रुग्णालयात जाण्यासाठी साकेगाव बसस्थानकावर आले होते. त्यावेळी भुसावळ येथील काही तरुण तेथे आले. जुन्या वादातून त्यांच्यात वाद सुरू झाला.
काही वेळातच वादाचे रूपांतर हाणामारीत झाले. यावेळी संशयितांनी धारदार शस्त्राने राहुल कोळी याच्या मानेवर वार केला, तर कुणाल वाघ याच्यावरही हल्ला करण्यात आला. अचानक झालेल्या या हल्ल्यात दोघेही गंभीर जखमी झाले. त्यांना तत्काळ डॉ. उल्हास पाटील रुग्णालयात दाखल करण्यात आले.
घटनेची माहिती मिळताच भुसावळ तालुका पोलिसांनी घटनास्थळी धाव घेतली. हल्ल्यात सहभागी संशयितांची ओळख पटविण्यासह त्यांचा शोध घेण्याचे काम पोलिसांकडून सुरू आहे. रात्री उशिरापर्यंत गुन्हा दाखल करण्याची प्रक्रिया सुरू होती.
साकेगाव बसस्थानकासारख्या सार्वजनिक ठिकाणी झालेल्या या हल्ल्यामुळे परिसरात खळबळ उडाली असून, भुसावळ तालुक्यातील वाढत्या गुन्हेगारीच्या घटनांबाबत नागरिकांमध्ये चिंता व्यक्त होत आहे.
