लोकशाही न्यूज नेटवर्क
बल्लारपूरजवळील विसापूर रोडवरील टोल प्लाझा परिसरात एका दुचाकीला भीषण आग लागल्याची घटना घडली. या आगीत दुचाकी पूर्णपणे जळून खाक झाली असून वाहनाचे मोठे नुकसान झाले आहे. प्रत्यक्षदर्शींनी दिलेल्या माहितीनुसार, महामार्गाच्या कडेला दुचाकी अचानक पेट घेतल्याने काही काळ परिसरात खळबळ उडाली. आग इतकी भीषण होती की वाहनावरील प्लास्टिकचे भाग, वायरिंग तसेच पुढील चाकाचा काही भाग पूर्णपणे जळून गेला.
घटनेनंतर दुचाकीचा केवळ लोखंडी सांगाडाच शिल्लक राहिलेला दिसून आला. तसेच सुदैवाने या घटनेत कोणतीही जीवितहानी झाल्याची माहिती समोर आलेली नाही. मात्र आग नेमकी कशामुळे लागली, याचे कारण अद्याप स्पष्ट झालेले नाही. तांत्रिक बिघाड, शॉर्टसर्किट किंवा इतर कारणांमुळे ही घटना घडली असण्याची शक्यता व्यक्त केली जात आहे. घटनेची माहिती मिळताच संबंधित यंत्रणा घटनास्थळी दाखल झाली. या प्रकरणी अधिक तपास सुरू असून अधिकृत अहवालानंतरच आगीचे नेमके कारण स्पष्ट होणार आहे.
