प्रदीप पूर्णेकर हत्त्या प्रकरण : पोलिसांच्या नऊ पथकांकडून तपास
ठाणे : मानपाडा परिसरातील ठाकरे गटाचे विभागप्रमुख प्रदीप पूर्णेकर यांची मंगळवारी रात्री गोळ्या झाडून हत्या करण्यात आली होती. पाच जणांनी त्यांच्या कार्यालयात घुसून त्यांच्यावर गोळ्या झाडल्या होत्या आणि पूर्णेकर यांच्यावर कोयत्याने वार केले होते. यानंतर हे आरोपी पळून गेले होते. यापैकी आणखी दोन आरोपींना अटक करण्यात ठाणे गु्‌‍हे शाखेला यश आले आहे. पोलिसांनी ताब्यात घेतलेला निखिल यादव हा प्रदीप पूर्णेकर यांच्या ऑफिसच्या बाजूला वडापावाच्या गाडीवर काम करायचा, अशी माहिती आहे तर नितेश पवार हा सराईत गुन्हेगार आहे.
ठाणे गुन्हे शाखेचे डीसीपी अमरसिंह जाधव यांच्या नेतृत्त्वाखाली आरोपींना शोधण्यासाठी पोलिसांची एकूण नऊ पथके तयार करण्यात आली होती. यापैकी पप्या शिंदे याला पोलिसांनी अगोदरच ताब्यात घेतले होते. तर आता निखिल यादव आणि नितेश पवार या दोघांना पोलिसांनी अटक केली आहे. मुंबई-गोवा महामार्गावर अलिबागजवळ एका डेअरीत हे दोन्ही आरोपी लपून बसले होते. काल पोलिसांनी मिरा-भाईंदरमधून पप्या शिंदे याच्या संपर्कात असलेल्या काही महिला व पुरुषांना ताब्यात घेतले होते. त्यांच्या चौकशीतून पोलिसांना आरोपी लपून बसू शकतात, असा संभाव्य ठिकाणांची माहिती मिळाली होती. त्यानुसार पोलिसांनी अलिबागजवळच्या डेअरीवर छापा टाकून निखिल यादव आणि नितेश पवार या दोघांना ताब्यात घेतले. यापैकी निखिल यादव याने प्रदीप पूर्णेकर यांच्यावर गोळ्या झाडल्या होत्या. तर नितेश पवार उर्फ भावड्या याने प्रदीप पूर्णेकर यांच्यावर कोयत्याने वार केले होते. नितेश पवार हा हिस्ट्रीशिटर गुन्हेगार आहे. त्याच्यावर यापूर्वी अनेक गुन्हे दाखल आहेत.
