लोकशाही न्यूज नेटवर्क
जुन्नर तालुक्यातील वसईवाडी येथील तळेरान गावात अत्यंत हृदयद्रावक घटना घडली आहे. पाझर तलावात बुडून जुळ्या भावंडांचा मृत्यू झाला आहे. या घटनेमुळे गावातून हळहळ व्यक्त केली जातेय. श्रावणी रामदास साबळे आणि गणेश रामदास साबळे, अशी मृत मुलांची नावं आहेत.
साबळे कुटुंबीय कपडे धुण्यासाठी गावाजवळील पाझर तलावावर गेले होते. त्यावेळी कुटुंबातील व्यक्ती कपडे धुण्यात व्यस्त असताना श्रावणी आणि गणेश हे दोन्ही तलावाच्या काठावर खेळत होती. खेळता-खेळता दोघेही पाण्यात उतरले. मात्र खोल पाण्याचा अंदाज न आल्याने दोघेही पाण्यात बुडाली. काही वेळाने मुले दिसेनाशी झाल्याने कुटुंबीयांनी शोधाशोध सुरू केली. त्यानंतर ग्रामस्थांच्या मदतीने दोघांना बाहेर काढण्यात आले, मात्र तोपर्यंत उशीर झाला होता.
या दुर्दैवी घटनेनंतर गावकऱ्यांनी जलस्रोतांवर सुरक्षेची उपाययोजना करण्याची मागणी केली आहे. लहान मुलांवर सतत लक्ष ठेवण्याची गरज व्यक्त केली आहे. स्थानिक प्रशासनानेही याची दखल घेऊन उपाययोजना कराव्यात, अशी मागणी होतेय.
