जळगाव, लोकशाही न्यूज नेटवर्क
आदिवासी समाजाचे नेते लकी जाधव यांना सोशल मीडियावर अपमानास्पद भाषा वापरून जीवे मारण्याची धमकी देण्यात आल्याची गंभीर घटना समोर आली आहे. या प्रकरणी संबंधित आरोपी अक्की चव्हाण व त्याच्या साथीदारांवर अनुसूचित जमाती अत्याचार प्रतिबंधक कायद्यानुसार गुन्हा दाखल करण्याची मागणी करण्यात आली आहे.
मिळालेल्या माहितीनुसार, २८ एप्रिल २०२६ रोजी यवतमाळ जिल्ह्यातील धामणगाव देव येथे मुंगसाजी महाराजांचे दर्शन घेऊन परत येत असताना कोहळा गावाजवळ काही व्यक्तींनी लकी जाधव यांच्या वाहनाला अडवले. यावेळी लखन पवार, तुषार जाधव व त्यांच्या साथीदारांनी जाधव यांना जातीवाचक शिवीगाळ करत धमक्या दिल्याचा आरोप आहे. “आदिवासी हक्कांबाबत बोललास तर जिवंत सोडणार नाही,” अशी धमकी देण्यात आल्याचे साक्षीदारांनी सांगितले आहे.
घटनेनंतर अक्की चव्हाण नावाच्या युवकाने इंस्टाग्रामवर व्हिडिओ पोस्ट करून लकी जाधव यांच्याबद्दल आक्षेपार्ह व अवमानकारक वक्तव्य केले. या व्हिडिओमधील भाषेतून अप्रत्यक्षपणे जीवे मारण्याची धमकी देण्यात आल्याचा आरोप आहे. या घटनेमुळे लकी जाधव यांच्या जिवितास धोका निर्माण झाल्याचे सांगत त्यांना तात्काळ पोलीस संरक्षण देण्याची मागणी करण्यात आली आहे.
दरम्यान संबंधित आरोपींवर अॅट्रॉसिटी कायद्यांतर्गत कठोर कारवाई करण्याची मागणीही करण्यात आली आहे. या प्रकरणाची तक्रार पोलिसांकडे दाखल करण्याची प्रक्रिया सुरू असून, पोलीस प्रशासनाकडून पुढील तपास अपेक्षित आहे.
