लोकशाही न्यूज नेटवर्क
पाकिस्तानची राजधानी इस्लामाबादमध्ये एका रुग्णालयाला भीषण आग लागल्याची धक्कादायक घटना समोर आली आहे. या दुर्घटनेत 16 नवजात बालकांपैकी तब्बल 15 बालकांचा दुर्दैवी मृत्यू झाला असून, एका बालकाला सुरक्षित बाहेर काढण्यात बचाव पथकाला यश आले आहे. ही घटना पाकिस्तान इन्स्टिट्यूट ऑफ मेडिकल सायन्सेस (PIMS) येथील स्त्रीरोग विभागातील नर्सरीमध्ये घडल्याची माहिती आहे.
मिळालेल्या माहितीनुसार, सकाळच्या सुमारास रुग्णालयातील नर्सरीमध्ये अचानक आग लागली. त्यावेळी या ठिकाणी 16 नवजात बालकांवर उपचार सुरू होते. आगीची माहिती मिळताच रुग्णालय प्रशासन आणि बचाव पथकाने तातडीने घटनास्थळी धाव घेत बचावकार्य सुरू केले. मात्र, आगीने काही वेळातच गंभीर स्वरूप धारण केल्याने मोठी दुर्घटना घडली.
बचाव पथकाच्या प्राथमिक माहितीनुसार, नर्सरीमध्ये असलेल्या एअर कंडिशनरच्या कॉम्प्रेसरमध्ये स्फोट झाल्याने आग लागल्याचा अंदाज व्यक्त करण्यात आला आहे. त्यानंतर आग वेगाने पसरल्याचे अधिकाऱ्यांनी सांगितले. आगीचे नेमके कारण आणि घटनेतील इतर बाबींचा तपास सुरू आहे.
या दुर्घटनेनंतर रुग्णालय परिसरात मोठी खळबळ उडाली असून, नवजात बालकांच्या मृत्यूमुळे हळहळ व्यक्त केली जात आहे. रुग्णालय प्रशासन आणि संबंधित अधिकाऱ्यांकडून घटनेची चौकशी केली जात आहे. दरम्यान, भारतातील अमरावती येथेही अलीकडेच रुग्णालयातील आगीची घटना समोर आली होती. त्यामुळे रुग्णालयांमधील अग्निसुरक्षा व्यवस्थेचा मुद्दा पुन्हा एकदा ऐरणीवर आला आहे.
