अपहरणाच्या संशयावरून तरुणाची तलवारीसह दहशत
जळगाव प्रतिनिधि
शहरातील वाल्मिक नगर परिसरात अपहरणाच्या संशयावरून एका तरुणाने हातात तलवार घेऊन गोंधळ घातल्याची घटना रविवारी सकाळी ११ वाजता घडली. या तरुणाने धार्मिक स्थाल्च्य परिसरातील पाण्याचे माठ आणि प्लास्टिकच्या टाकीची तोडफोड केली. पोलिसांनी तत्काळ घटनास्थळी धाव घेत संशयिताला अटक केली. त्यानंतर पोलीस ठाण्यासमोर मोठ्या प्रमाणावर नागरिक जमा झाले, त्यामुळे परिसरात तणावाचे वातावरण निर्माण झाले होते.
वाल्मिक नगरातील एका घराबाहेर अल्पवयीन मुलगा खेळत असताना काही अनोळखी व्यक्ती त्या भागात आल्या. त्यांच्यावर मुलाच्या अपहरणाचा संशय आल्याने परिसरातील नागरिक सतर्क झाले. या दरम्यान, प्रवीण रमेश कोळी (वय ३०, रा. पिंजारीवाडा, वाल्मिक नगर) या तरुणाने आपल्या घरातून धारदार तलवार घेतली आणि संशयितांच्या दिशेने धाव घेतली. त्याला पाहून संशयित तिथून पळून गेले.
संशयित व्यक्ती गेल्याचे समजल्यानंतर प्रवीण कोळी तलवार घेऊन तिथे पोहोचला. त्याने तिथे ठेवलेले पाण्याचे माठ आणि प्लास्टिकच्या टाकीवर तलवारीने वार करत तोडफोड केली. त्याच्या या कृत्यामुळे परिसरात दहशतीचे वातावरण निर्माण झाले.
घटनेची माहिती मिळताच शनिपेठ पोलीस ठाण्याचे निरीक्षक रंगनाथ धारबळे, पोहेकॉ. गिरीश पाटील, गजानन पाटील आणि अनिल कांबळे यांनी घटनास्थळी धाव घेतली. त्यांनी प्रवीण कोळीला ताब्यात घेतले. मात्र, यानंतर दोन्ही गटातील नागरिक पोलीस ठाण्यासमोर जमले, त्यामुळे तणाव निर्माण झाला.
परिसरातील तणाव लक्षात घेऊन उपविभागीय पोलीस अधिकारी संदीप गावित यांनी शनिपेठ पोलीस ठाण्यात धाव घेतली. स्थानिक नागरिकांनी त्यांच्याशी चर्चा करत तातडीने कारवाईची मागणी केली. त्यानुसार, अपहरणाचा संशयित प्रयत्न करणाऱ्या अज्ञात व्यक्तींविरुद्ध गुन्हा दाखल करण्यात आला आहे. तसेच, तलवारीसह तोडफोड व दहशत निर्माण करणाऱ्या प्रवीण रमेश कोळीविरुद्धही गुन्हा दाखल करून त्याला अटक करण्यात आली आहे.
