नवी दिल्ली – राष्ट्रीय स्वयंसेवक संघाचे सरसंघचालक डॉ. मोहन भागवत यांनी दिवंगत संघनेते मोरोपंत पिंगळे यांचे उद्गार उद्धृत करून नुकत्याच केलेल्या विधानानंतर, वयाच्या 75 व्या वर्षी निवृत्तीबाबत पुन्हा एकदा राजकीय वादाचा धुरळा उडाला आहे. विरोधकांनी भागवत यांच्या विधानाचा संबंध पंतप्रधान नरेंद्र मोदी यांच्या वयाशी जोडल्यानंतर, भागवतांच्या बोलण्याचा विपर्यास केल्याचे स्पष्टीकरण संघवर्तुळातून देण्यात आले. भाजपच्या घटनेत सध्या निवृत्तीवयाची कोणतीही तरतूद नसल्याचे सांगण्यात आले.
नागपूरमधील एका कार्यक्रमात सरसंघचालकांनी पिंगळे यांचे उद्गार उद्धृत केले. ‘75 वर्षांची शाल पांघरली, याचा अर्थ आता तुम्ही त्या वयात पोहोचला आहात, थोडे बाजूला व्हा,’ असे पिंगळे यांनी म्हटले होते. डॉ. भागवत व पंतप्रधान मोदी येत्या सप्टेंबरमध्येच 75 वर्षांचे होत आहेत. हा धागा पकडून याचे राजकारण सुरू झाले आहे.
भाजपमध्ये 75 वर्षांच्या वयात निवृत्तीचा नियम आहे का? हा मुद्दा समोर आणून विरोधक मोदी यांची कोंडी करण्याचा प्रयत्न करतात. आपने लोकसभा निवडणुकीत प्रचाराच मोदी सप्टेंबरमध्ये निवृत्त होणार असल्याचा प्रचार केला होता. मात्र, ‘भाजपच्या घटनेत 75 व्या वर्षी निवृत्तीचा उल्लेख नाही. पंतप्रधान मोदी 75 वर्षांचे झाले, तर त्यामुळे कोणाला आनंदी होण्याची गरज नाही. मोदी हा कार्यकाळ पूर्ण करतील व भविष्यातही देशाचे नेतृत्व करीत राहतील, असे मागच्या वर्षी लोकसभा निवडणुकीदरम्यान भाजप नेते अमित शहा यांनी स्पष्ट केले होते.
अमित शहा हे भाजपचे राष्ट्रीय अध्यक्ष असताना, पक्षाने 26 ऑगस्ट 2014 रोजी पक्षासाठी मार्गदर्शक मंडळ निर्माण करून त्यात वरिष्ठ नेत्यांची नियुक्ती केली होती. या यादीत अटलबिहारी वाजपेयी, लालकृष्ण अडवाणी, मुरली मनोहर जोशी यांच्यासह मोदी आणि राजनाथ सिंह यांची नावेही होती; परंतु भाजपची सर्वांत शक्तिशाली संस्था असलेल्या संसदीय मंडळाची फेररचना करून वाजपेयी, अडवाणी व जोशी यांना वगळल्यानंतर, मार्गदर्शक मंडळाला ‘निवृत्तांचे मंडळ’ मानण्याची चर्चा सुरू झाली होती. 2016 नंतर प्रत्येक निवडणुकीत 75 वर्षांपेक्षा ज्येष्ठ नेत्यांना तिकीट देणार नाही, अशी चर्चा होऊ लागली. भाजपने तत्कालीन लोकसभाध्यक्षा सुमित्रा महाजन यांच्यासह अनेकांबाबत याचे पालन केले. यातही कर्नाटकाचे बी. एस. येडियुरप्पा, पंजाबचे कॅप्टन अमरिंदरसिंग, 2021 च्या केरळ विधानसभा निवडणुकीतील भाजप उमेदवार 88 वर्षीय ई. श्रीधरन यांच्यासारखे अपवाद ठेवले. सरसंघचालकांनी असे सुचवले आहे, की 75 वर्षांनंतर व्यक्तीने इतरांसाठी मार्ग मोकळा करावा. या विधानामुळे सर्वांना आनंद झाला पाहिजे. कारण यातून भारतासाठी, संविधानासाठी आणि देशाच्या आत्म्यासाठी अच्छे दिन येत आहेत. कारण नरेंद्र मोदी आणि मोहन भागवत जाणार आहेत, अशी उपरोधिक टीका काँग्रेसने केली.
मुक्तता मिळेल काय?
भागवत यांनी एक चांगली बातमी दिली. ते म्हणाले, 75 वर्षांचे झाल्यानंतर, दुसऱ्याला संधी दिली पाहिजे. गेल्या 11 वर्षात त्यांनी (मोदींनी) देशाला, संविधानाला आणि संवैधानिक संस्थांना ज्या स्थितीत आणले आहे, त्यातून आपल्याला 17 सप्टेंबर रोजी मुक्तता मिळेल आणि 17 सप्टेंबर हा दिवस त्यातून मुक्त होण्याचे पहिले पाऊल असेल,’ अशी टीका काँग्रेस नेते पवन खेरा यांनी केली.
