चंद्रपूर, लोकशाही न्यूज नेटवर्क
मूल तालुक्यात मंगळवारी दुपारी आलेल्या अचानक तुफान चक्रीवादळाने मोठा कहर केला. राजोली येथील रहिवासी प्रशांत डोनुजी शेणमारे (वय ४५) यांचा शेड कोसळून जागीच दुर्दैवी मृत्यू झाला. या घटनेमुळे संपूर्ण राजोली गावावर शोककळा पसरली असून परिसरात हळहळ व्यक्त केली जात आहे.
मिळालेल्या माहितीनुसार, मंगळवार दि. ०५ मे २०२६ रोजी दुपारी सुमारे ३.३० वाजताच्या सुमारास तीव्र उकाड्यानंतर अचानक जोरदार तुफान चक्रीवादळासह गारपीट व मुसळधार पावसाने हजेरी लावली. वादळाचा वेग इतका प्रचंड होता की अनेक ठिकाणी झाडे उन्मळून पडली.
तसेच राजोली रेल्वे स्टेशनजवळील आपल्या शेतात प्रशांत शेणमारे यांनी नुकताच सिमेंट विटा निर्मितीचा व्यवसाय सुरू केला होता. त्यासाठी त्यांनी सिमेंट विटांचे शेड उभारले होते. वादळ सुरू होताच प्रशांत यांनी शेडखाली आश्रय घेतला. मात्र काही क्षणातच जोरदार वाऱ्यामुळे संपूर्ण शेड कोसळले आणि ते ढिगाऱ्याखाली दबले गेले. या भीषण दुर्घटनेत त्यांचा जागीच मृत्यू झाला.
याशिवाय घटनेची माहिती मिळताच मूल पोलीस तात्काळ घटनास्थळी दाखल झाले. पोलिसांनी पंचनामा करून मृतदेह शवविच्छेदनासाठी उपजिल्हा रुग्णालय, मूल येथे पाठविला. मृत प्रशांत शेणमारे यांच्या पश्चात पत्नी व दोन मुले असा परिवार आहे.
दरम्यान, तुफान वादळामुळे राजोली मूल मार्गावर अनेक ठिकाणी मोठी झाडे कोसळली. एका ठिकाणी झाडाखाली चारचाकी वाहन दबले असून वाहनाचे मोठे नुकसान झाल्याची माहिती आहे. दुपारी साडेतीन वाजल्यापासून राजोली–मूल मार्गावरील वाहतूक पूर्णपणे ठप्प झाली असून दोन्ही बाजूंना वाहनांच्या रांगा लागल्या आहेत. या घटनेचा पुढील तपास पोलीस निरीक्षक विजय राठोड यांच्या मार्गदर्शनाखाली सुरू आहे.
