उड्डाण घेतलं अन संपर्क तुटला : अहमदाबादची पुनरावृत्ती

लोकशाही न्यूज नेटवर्क

रशियामध्ये ५० प्रवाशांना घेऊन जाणारे विमान कोसळले. रशियाच्या सुदूर पूर्व भागामध्ये हे विमान कोसळले. कोसळल्यानंतर या विमानाचे तुकडे तुकडे झाले. या अपघातामध्ये विमानामध्ये असलेल्या सर्व ५० प्रवाशांचा मृत्यू झाला. हे विमान AN-24 प्रवासी विमान होते. सायबेरियाच्या अंगारा एअरलाइन्स या कंपनीचे हे विमान असल्याचे सांगितले जात आहे. या विमान अपघातानंतरचे फोटो आणि व्हिडीओ समोर आले आहेत.

मिळालेल्या माहितीनुसार, रशियामध्ये AN-24 ट्विन टर्बोप्रॉप प्रवासी विमान कोसळले. हे विमान ब्लागोवेश्चेन्स्कहून टिंडा येथे जात होते. चीन सीमेजवळील अमूर प्रदेशात हे विमान कोसळले. उड्डाणा केल्यानंतर या विमानाचा अचानक हवाई वाहतूक नियंत्रणाशी संपर्क तुटला. त्यानंतर हे विमान कोसळल्याची माहिती समोर आली.

हे विमान चीनच्या सीमेनजीकच्या अमूरमधील टिंडा शहराच्या दिशेने जात होते. हे विमान टिंडा शहरातील विमानतळावर पोहचण्यापूर्वीच त्याचा संपूर्क तुटला. या विमानामध्ये ५ मुलांसह ४३ प्रवासी आणि ६ क्रू मेंबर्स होते. या सर्वांचा या विमान अपघातामध्ये मृत्यू झाला असल्याचे सांगितले जात आहे.

अपघातग्रस्त विमान उड्डाण घेतल्यानंतर त्याच्या गंतव्यस्थानाच्या काही किलोमीटर आधी रडारवरून गायब झाले. अपघातानंतर या विमानाचे तुकडे तुकडे झाले. याचे फोटो देखील समोर आले आहेत. घटनास्थळावर बचाव कार्य सुरू आहे. रॉयटर्स वृत्तसंस्थाच्या वृत्तानुसार, या अपघातामध्ये विमानातून प्रवास करणारा एकही जण जिवंत राहिला नाही.