लोकशाही न्यूज नेटवर्क
भुसावळ शहरालगत झेडटीआरआय बोगद्याजवळील मंदिराचे मुख्य पूजारी यांची अज्ञात हल्लेखोरांनी डोक्यात जड वस्तूने वार करून निर्घृण हत्या केल्याची धक्कादायक घटना सोमवारी (२९ जून) सकाळी उघडकीस आली. या घटनेमुळे भुसावळ शहरासह रेल्वे परिसरात खळबळ उडाली असून, पोलिसांनी अज्ञात आरोपींविरुद्ध खुनाचा गुन्हा दाखल करून तपासाला वेग दिला आहे.
संतोष रघुवीर मंचल (वय ५५, रा. झेडटीआरआय परिसर, भुसावळ) असे मृत पूजार्याचे नाव आहे. आरपीडी रस्त्यालगत लष्करी डेपोपासून सुमारे एक किलोमीटर अंतरावर असलेल्या तीन मंदिरांमध्ये ते गेल्या अनेक वर्षांपासून नियमित पूजा-अर्चा करत होते. सोमवारी सकाळी सुमारे ११ वाजण्याच्या सुमारास त्यांचे कुटुंबीय नेहमीप्रमाणे मंदिरात गेले असता, मंदिराच्या आवारात संतोष मंचल यांचा रक्ताच्या थारोळ्यात पडलेला मृतदेह आढळून आला. अज्ञात व्यक्तींनी त्यांच्या डोक्यावर जड व टणक वस्तूने जबर प्रहार केल्याने त्यांचा जागीच मृत्यू झाला होता. घटनेची माहिती मिळताच परिसरातील नागरिकांनी मोठी गर्दी केली आणि शहर पोलिसांना कळविण्यात आले.
माहिती मिळताच पोलीस उपअधीक्षक केदार बारबोले, शहर पोलीस निरीक्षक महेश गायकवाड, हवालदार संदीप पालवे यांच्यासह पोलिसांचे पथक घटनास्थळी दाखल झाले. पोलिसांनी पंचनामा करून मृतदेह उत्तरीय तपासणीसाठी शासकीय रुग्णालयात पाठविला. ही हत्या चोरीच्या उद्देशाने करण्यात आली की वैयक्तिक वैमनस्य, आर्थिक व्यवहार किंवा जमीन वादातून घडली, याबाबत अद्याप कोणतीही स्पष्ट माहिती समोर आलेली नाही. तपासासाठी जळगाव येथून ठसे तज्ज्ञ आणि फॉरेन्सिक पथकाला पाचारण करण्यात आले असून, घटनास्थळावरील महत्त्वाचे नमुने संकलित करण्यात आले आहेत. संशयितांचा शोध घेण्यासाठी पोलिसांची स्वतंत्र पथके रवाना करण्यात आली असून, भुसावळ शहर पोलीस ठाण्यात अज्ञात आरोपींविरुद्ध खुनाचा गुन्हा दाखल करण्यात आला आहे.
