पारोळ्या जवळ गॅस टॅंकर उलटल्याने परिसरात भीती

नागरिकांना सतर्कतेचा इशारा : मध्यरात्रीची घटना

0

 

पारोळा, लोकशाही न्युज नेटवर्क 

पारोळा शहराजवळील महामार्गावरून भरधाव वेगाने जाणारे गॅस टँकर शहराच्या जवळच असलेल्या बायपास मध्यरात्रीच्या सुमारास  उलटले असून यातून गॅसची गळती सुरू झाल्याने पोलीस प्रशासनाकडून मदत कार्य सुरू करण्यात आले आहे. या ठिकाणी रहिवासी एरिया असल्याने येथिल स्थानिकांना घाबरून न जाता सतर्कतेचा इशारा देण्यात आला आहे.

पारोळा शहराच्या बाहेरून जाणाऱ्या बायपास जवळ मध्यरात्री दोन वाजेच्या सुमारास हा अपघात घडला असल्याची माहिती मिळाली. यात धुळ्याकडून जळगावकडे जाणाऱ्या टँकरच्या चालकाचे वाहनावरील नियंत्रण सुटल्याने ते टँकर हायवेच्या बाजूला जाऊन उलटले. तसेच यातून तात्काळ गॅसची गळती सुरू झाली.

या अपघाताची माहिती मिळताच पारोळा पोलिसांनी तात्काळ घटनास्थळी धाव घेऊन अपघातग्रस्तांना रुग्णालयात दाखल केले. दरम्यान, अपघातानंतर या टैंकरमधून गॅसची गळती झाल्यामुळे परिसरात घबराट पसरली आहे.

पुढे कोणताही अनर्थ होऊ नये म्हणून पोलिसांनी खबरदारीचा उपाय म्हणून या परिसरातील नागरिकांना सतर्कतेचा इशारा दिला असून अनेक जण आपापल्या घरातून बाहेर पडून सुरक्षित ठिकाणी गेले असल्याची माहिती मिळाली आहे. सकाळ पर्यंत घटनास्थळी पोलीस ठाण मांडून बसले असून सोबतीला सतर्कता म्हणून अग्नीशामक दलाचा बंब आणि रूग्णवाहिका देखील बोलावण्यात आलेली आहे.

या सर्व परिस्थितीत वर पारोळा येथील पोलिस निरीक्षक सुनील पवार हे स्वतः उपस्थित राहुन परिस्थिती वर लक्ष ठेवून आहेत. स्थानिक पोलिसांनी महामार्गावरील वाहतूक दुसऱ्या मार्गाने वळवुन वाहतुक सुरळीत केली आहे.

Leave A Reply

Your email address will not be published.