भाजपचे उद्योग आघाडीचे प्रदेशाध्यक्ष सुधाकर खाडेंची हत्या

सांगली, लोकशाही न्यूज नेटवर्क 

विधानसभा निवडणुकांच्या धामधुमीत सांगलीत धक्कादायक घटना घडली आहे. येथे भाजपाचे माजी जिल्हाध्यक्ष सुधाकर खाडे यांची हत्या करण्यात आली आहे. मिरजेत पंढरपूर रोडवरील राम मंदिरजवळ त्यांची हत्या करण्यात आल्याची माहिती आहे. शेत जमिनीच्या वादातून कुऱ्हाडीने वार करून सुधाकर खाडे यांची हत्या करण्यात आल्याचे बोलले जात आहे. या घटनेने परिसरात एकच खळबळ माजली आहे.

सुधाकर खाडे यांच्यावर वार झाल्यानंतर त्यांनी जखमी अवस्थेत तात्काळ रुग्णालयात नेण्यात आले. मात्र, तिथे डॉक्टर त्यांच्यावर उपचार करतील त्यापूर्वीच त्यांचा मृत्यू झाला होता. या घटनेची माहिती मिळताच घटनास्थळी मिरज पोलिसांचे पथक दाखल झाले असून पोलिसांनी पंचनामा करत हत्येचा गुन्हा दाखल केला आहे. सध्या पोलीस याप्रकरणी तपास करत आहेत. सुधाकर खाडे हे भाजप उद्योग आघाडी स्टार्टअप इंडियाचे प्रदेशाध्यक्ष होते. त्यांच्या मानेवर कुऱ्हाडीने वार करत त्यांची हत्या करण्यात आली आहे. याप्रकरणी पोलिसांनी एका संशयिताला ताब्यात घेतल्याची माहिती आहे.

मिळालेल्या माहितीनुसार, शनिवार दि. 9 नोव्हेंबर रोजी सकाळी दहा वाजण्याच्या सुमारास त्यांचा पंढरपूर रोड येथील राम मंदिर जवळ असलेल्या जागेत प्रॉपर्टीच्या कारणावरून एका सोबत वाद झाला. त्यातून संशयित व्यक्तीने कुऱ्हाडीचा मानेवर गंभीर घाव घालून त्यांचा निर्घृण खून केला. त्यानंतर गंभीर जखमी अवस्थेत त्यांना मिरजेतील एका खाजगी रुग्णालयात दाखल करण्यात आले. परंतु वैद्यकीय अधिकाऱ्यांनी त्यांना तपासून मृत घोषित केले. सदर घटनेबाबत घटनास्थळी पोलीस दाखल झाले असून याबाबत एका संशयताला ताब्यात घेण्यात आले आहे. याबाबतचा पुढील तपास महात्मा गांधी चौक पोलीस करीत आहेत

जमिनीचा वाद

सुधाकर खाडे यांनी मिरजेत पंढरपूर रस्त्यावरील राम मंदिरलगत चंदनवाले मळा येथील पावणेचार एकर जमीन ही घेतली होती. मात्र, या ठिकाणी काही हरकती घेतल्याने गेल्या काही महिन्यांपासून सुधाकर खाडे आणि संशयित व्यक्तीचा वाद सुरू होता. या जागेवर कुंपण घालण्यासाठी सुधाकर खाडे हे आठ ते दहा साथीदारांसोबत गेले होते. यावेळी शेत जमिनीचे कब्जाधारक आणि सुधाकर खाडे यांच्यात जोरदार वाद झाला. यावेळी सुधाकर खाडे यांच्यावर अचानक मागून कुऱ्हाडीने हल्ला करण्यात आला. ज्यामध्ये ते गंभीर जखमी झाले आणि त्यातच त्यांचा मृत्यू झाला.