नागपूर, चंद्रपूर महामार्गावर स्ट्रीट लाईट पोल वाकला

चंद्रपूर, लोकशाही न्यूज नेटवर्क

नागपूर, चंद्रपूर महामार्गावर भद्रावती तहसील कार्यालयाच्या परिसरात उभारलेला स्ट्रीट लाईट पोल धोकादायक अवस्थेत वाकलेला असल्याचे प्रत्यक्ष पाहणीत स्पष्ट झाले आहे. पोलच्या तळभागातील नट-बोल्ट सैल झाल्याने तो एका बाजूला झुकला असून, तळाशी असलेला विद्युत बॉक्स उघडा पडलेला आहे.

दरम्यान फोटोमध्ये दिसत असल्याप्रमाणे, पोलचा पाया हललेला असून लोखंडी अँकर बोल्ट बाहेर आलेले आहेत. तसेच विद्युत जोडण्या उघड्या अवस्थेत असल्याने विजेचा धक्का लागण्याची शक्यता नाकारता येत नाही. महामार्गावरील मध्यवर्ती विभाजकावर हा पोल उभारलेला असल्याने वाहनचालक आणि पादचाऱ्यांसाठी मोठा धोका निर्माण झाला आहे.

या प्रकाराकडे लक्ष वेधत भाजयुमोचे प्रदेश सचिव तथा जनसेवक इम्रान खान यांनी नगरपरिषद प्रशासनाकडे तातडीने दुरुस्तीची मागणी केली आहे. “कोणतीही दुर्घटना घडण्यापूर्वी संबंधित यंत्रणांनी त्वरित पाहणी करून पोल सुरक्षित करावा,” अशी मागणी त्यांनी केली आहे.

नागपूर, चंद्रपूर हा महत्त्वाचा मार्ग असल्याने येथे पायाभूत सुविधांची नियमित तपासणी आणि देखभाल अत्यावश्यक आहे. मात्र, अशा प्रकारे पोल झुकलेला आणि विद्युत बॉक्स उघडा राहणे ही प्रशासनाच्या दुर्लक्षाची बाब असल्याची चर्चा नागरिकांत आहे. तसेच स्थानिक नागरिकांनीही तात्काळ कारवाईची मागणी केली असून, महामार्गावरील खड्डे आणि प्रकाशयोजनेच्या समस्यांमुळे वाहतूक अधिक धोकादायक होत असल्याचे मत व्यक्त केले आहे. याशिवाय प्रशासनाने तातडीने दुरुस्ती करून महामार्ग सुरक्षित करावा, अशी सर्वसामान्यांची मागणी जोर धरत आहे.